Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITYOUGH 31

Ape Se Zua a Msurshima Yô

Ape Se Zua a Msurshima Yô

I LU nahan ú ule shi huan we vee?— Shin mase zan ú pine ken ishima you wer, or shí soo kwagh wou je kpa, vee?— Mbayev mbagenev ka ve pine ayol ave nahan. Kpa Aôndo er ityendezwa ér: ‘Mo yô, me hungur we ga.’ (Yesaia 49:15) Kwagh ne doo u se hen sha mi gaa?— Sha kpôô yô, se doo Yehova Aôndo ishima je zua ga!

Ú hen wer a lu waniyôngo u a saa ne ken ishima nena?

Orngeren Bibilo ugen kaa ér: ‘Aluer terem man ngôm vea undum, kpa TER Una tôôm.’ (Pasalmi 27:10) U fan ser Aôndo una undu se ga la ka kwagh u surun se ishima kpen kpen, shin ka nahan ga?— Yehova kaa a vese ér: ‘De cie ga, gadia M ngu a we, Me waseu.’—Yesaia 41:10.

Nahan kpa, ashighe agen yô, Yehova ka a de ér Satan a̱ za se iyol. Kwagen je yô, Yehova ka a de ér Satan a̱ kar ior mba ve civir Un je kpaa. Kwagen la Diabolo na Yesu ya ican je, gande Yesu vaa a Yehova kaa ér: “Aôndo Wam, Aôndo Wam, ka nyi U undumu?” (Mateu 27:46) Er Yesu lu yan ican nahan kpa, fa ér un doo Yehova ishima her yô. (Yohane 10:17) Kpa Yesu shi yange fa ér Aôndo ka a de ér Satan a̱ kar mbacivir Un, shi a de ér Satan a̱ er ve, ve̱ ya ican kpaa. Sé time sha ityôkyaa i í ne ve Aôndo ka a de ér Satan a̱ er kwagh nahan la ken ityough ki genegh.

Shighe u se lu iyev la, ashighe agen se cia kwagh kpee. U tesen ikyav yô, í lu nahan ú tsume ú kera fa ijiir í ú lu la ga vee?— Yange cier we iyol kpa?— Mbayev mbagen kpishi a cier ve iyol. Ortesen Uhemban yange ôr kwagh u kwagh u saan ugen. Kpa lu wanye nan saa ga. Lu waniyôngo.

Afatyô u tôôn we karen sha iyôngo sha igbenda igenegh. Inja  nena? Nenge ase yô, iyôngo ngi taver iyol yum ga. Shi ka i gba u or nana nengen sha í shi nana kuran í kpaa. Mba yer or u nengen sha iyôngo ér orkuranilev.

Yesu yange ôr injakwagh í orkuranilev ugen u lu a iyôngo deri môm yô. Kpa iyôngo igen gema saa. Alaghga yange i̱ soo ér ia nenge kwagh u a lu sha igyungu vegher ugen la. Kpa ica gba ga tsô, iyôngo la i̱ yem i̱ gba ica a iyôngo igen la. Ú hen wer iyôngo la yange ia gema ia nenge er i̱ lu tswen nahan, á lu i̱ nena?

Orkuranilev la va fe ér iyôngo saa un yô, un di er nena? Mase zan una kaa ér iyôngo la i̱ lan kwagh yum, nahan kwagh a gba un sha i̱ ga shinii? Shin una undu iyôngo í 99 la hen ijiir i injaa, una hide a za ker i môm laa? Una ya imba ican la nahan sha ci u iyôngo i môm tseeghlee?— Luun er ka we yange wea lu iyôngo i̱ i̱ saa la nahan, ma ú soo wer orkuranilev la a̱ ker ú ijime, a̱ za zua a we kpa?

Ka an nan lu er orkuranilev u a yem iyôngo na la nahana?

Iyôngo i orkuranilev la yange i doo un ishima kpishi, kua iyôngo i̱ i̱ saa la kpaa. Nahan a yem keren iyôngo shon i̱ i̱ saa la. Nenge ase er yange iyôngo shon ia nenge a orkuran i̱ ve, a doo i̱ sha wono! Shi Yesu kaa ér orkuranilev la kpa za zough a iyôngo na yô, doo un, ember kpishi. Á ember iyôngo i̱ i̱  saa ne hemba iyôngo i 99 i í saa ga la. Nahan ka an nan lu er orkuranilev u ken kwaghôron u Yesu laa? Ka an nan we se ikyo er orkuranilev la yange wa iyôngo na ikyo laa?— Yesu kaa ér ka Ter na u a lu sha la. Ter na la ka Yehova.

Yehova Aôndo ka Orkuran Uhembancii u a kor ior nav yô. Ior mba ve civir un cii ve doo un ishima, kua mbayev er we nahan kpaa. Á soo ér mô wase nana̱ vihi iyol shin nana̱ tim ga. Sha mimi yô, er se fe ser Aôndo we se ikyo yum nahan, ka kwagh u kundun se iyol kpen kpen je!—Mateu 18:12-14.

Ú nenge wer Yehova ngu kpôô kpôô er ú fe wer Ter ú ngu, shin ior mbagenev mba ú nengen a ve mbara nahan kpa?

Ú na Yehova Aôndo jighjigh sha mimi wou kpa?— Ú nenge wer ngu kpôô kpôô kpa?— Sha mimi yô, se fatyô u nengen a Yehova ga. Ityôkyaa yô, un ka Jijingi. Ngu a iyol i se fatyô u nengen a í sha ashe ga yô. Kpa ngu kpôô kpôô, shi una fatyô u nengen a vese kpaa. Ka sea keren iwasen kpa a fa. Shi se fatyô u ôron kwagh a na ken msen, di er ka se ôr kwagh a or shin tar nahan. Yehova  soo ér se̱ ôron kwagh a na.

Nahan aluer ú ule shin huan we yô, ú er nyi?— Ôr kwagh a Yehova. Kporom hen a na, nahan una sur ú ishima shi una wase ú kpaa. Umbur wer, ú doo Yehova ishima, kua shighe u í lu ú inja er ú ngu tswen la je kpaa. De se bugh ase Bibilo se ôr. Í ôr ken Pasalmi 23 heen, hii sha ivur i sha 1 la ér: “TER ka orkuran mo, kwagh môm banem ga; A erem, m yav inya henpe agumatoho a hem yô; A hemen mo A za a mo hen mngerem ma ma lu ving yô.”

Shi ungwa kwagh u orngeren la á seer ôron sha ivur i sha 4 la. Á kaa ér: “Shin mea karen ken pev u mure u kuugh kpaa, me cia kwagh u bo ga, sha ci u We U lu a mo yô; aga Wou man gbough Ough ka ve surun mo ishima.” Kape ior mba Yehova á lu Aôndo ve la ka i lu ve ken ishima je la. Ka ve zua a msurshima shighe u ve lu ken mzeyol yô. Kape we kpa i lu ú ken ishima laa?

Er orkuranilev u lun a dooshima ka nan wa iyôngo i nan ikyo nahan, kape Yehova a we ior nav ikyo doo doo je la. Tesen ve gbenda u vough ú vea kar yô, shi ka ve dondo un saan saan kpaa. Mbamzeyol ka vea kase ve vea wa atô je kpa, ve lu a mciem iyol ga. Orkuranilev ka nan kura iyôngo i nan sha ikyev i inyam toho sha aga u nan la, sha er ia kôr í ga yô. Bibilo  ôr er ngise Davidi, wanyekwaor u kuran ilev la kura iyôngo na sha ikyev i begha man inyamkyume i̱ í yer ér bear la yô. (1 Samuel 17:34-36) Shi ior mba Aôndo kpa fa ér Yehova una kura ve. Vea fatyô u lun a vangertiôr ér kwagh a er ve ga sha ci u Aôndo ngu a ve.

Ka an nana wase se shighe u kwagh a tser se la, di er orkuranilev ka nan kuran iyôngo i nan nahana?

Sha mimi yô iyôngo i Yehova doo un ishima, shi we í ikyo, nengen sha í doo doo kpaa. Bibilo kaa ér: ‘Una koso ilev Nav er orkuranilev nahan, Una kohol an ônov nav mba kiriki sha uwegh Nagh.’—Yesaia 40:11.

Er ú fe wer Yehova ka orkuranilev u lun a dooshima nahan, ­pever we iyol gaa?— Ú soo wer we kpa ú lu iyôngo na kpa?— ­Iyôngo ngi ongo imo i orkuran í. Ka i lu a orkuran í ikyooso ikyooso. Ú ongo imo i Yehova kpa?— Ú lun ikyua a na kpa?— Aluer ú ngu eren nahan yô, ityôkyaa ngi i ú cia kwagh ga. Yehova una lu a we.

Yehova we mba ve civir un la ikyo sha dooshima. De se ôr kwagh u Bibilo i er sha kwagh ne la, ken Pasalmi 37:25; 55:22; 54:23; man Luka 12:29-31.