Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

Washika u Mbahemenev mba Shin Itine

Washika u Mbahemenev mba Shin Itine

Hen Mba Civir Yehova a Vese Imôngo:

Er se lu mbacivir Yehova yô, Bibilo i i lu Mkaanem nam la doo se ishima tsung. Se na jighjigh ser akaa a yiase a i pase se ker la nga vough, shi ngi a akaawan a se suur sha mi ve se lu uma yô, shi akaa a i nger ker la tese ér tsombor u orumace doo un ishima. (Pasalmi 119:105; Luka 1:3; 1 Yohane 4:19) Sar se kpishi u wasen mbagenev ser ve fa akaa a mimi a doon tsung a a lu ken Mkaanem ma Aôndo la. Sha nahan yô, doo se kpishi u gberen takerada u u lu a itinekwagh ér, “Hen Akaainjaa ken Bibilo” ne. Yô, de se ôr ne kwagh u takerada ne kpuaa.

Akaa kpishi a i nger ken takerada ne la ka sha ci u mbayev. Nahan cii kpa, a fatyô u henen u vea mbaganden mba ve soo u seer fan Bibilo yô. Man er Bibilo i lu sha ci u hanma or yô, ikyav tese wang ér se cii se zua a mtsera sha u saven akaa a i nger ker la. Akaa ne aa na se zua a msaanyol u mimi.

Se dugh akaa agen a i er ken Bibilo la se gber ken takerada ne, sha u ôron yiase i tsombor u orumace, hii sha shighe u i hii u gban tar la je. Se nôngo kpoghuloo se nger akaaôron a ken Bibilo ne sha gbenda u a wanger shi a taver u kaven ga yô, shi se nôngo sha afatyô wase cii se nger akaa ne sha adondo adondo, er yange er la.

Nahan cii kpa, takerada ne pase di akaa a ken Bibilo tseegh tsô ga. I nger u shi i kpela ufoto ker sha gbenda u a wase se u nengen a akaa a i nger ken Bibilo la inja er nga eren her ave ave, shi wasen se u kaven er yange lu ior mba i lu ôron kwagh ve la ken ishima yô.

Takerada ne shi ua wase se u nengen kwagh u Bibilo i ôr sha ior mba yange ve ungwa imo i Yehova man mba ve ungwa ga la yô. Nahan se fatyô u henen kwagh ken akaa a yange er ve la. (Mbaromanu 15:4; 1 Mbakorinte 10:6) I pav takerada ne ker avegher 14. Ken mhii u hanma vegher cii, ka i sav ôron akaa agen a se fatyô u henen yô.

Wea lu ormaren yô, u fatyô u ôron ma ityough ki takerada ne vea wan wou shi lamen sha foto u a lu ken ityough ki shon la. Ne been yô, maa ne ôr avur a Bibilo a ityough ki shon ki har sha mi la. Wase wan wou nana nenge er hanma kwagh u nan hen ken ityough ki shon cii a due ken Bibilo yô. U fatyô u eren imba kwagh ne shighe u u lu wasen organden wer nana kav loho u Bibilo la kpaa.

Se na jighjigh ser takerada ne ua wase mbaasemaamimi cii, a lu mbayev shin mbaganden kpaa, u henen Mkaanem ma Aôndo shi dondon akaa a ve hen la ken uma ve, sha er ve kpa vea fatyô u lun ken tsombor u mbacivir un mba ve doo un ishima la yô.

Ka se anmgbianev enev,

Mbahemenev mba Shin Itine mba Mbashiada mba Yehova