Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 56

Yoshia Yange Soo Atindi a Aôndo

Yoshia Yange Soo Atindi a Aôndo

Yoshia yange lu anyom anigheni je maa hingir tor u Iserael. Hen shighe la, Mbaiserael lu civir akombo kua ieev. Yoshia va kom anyom 16 yô, a ker u fan gbenda u civir Yehova sha mimi. Shighe u lu anyom 20 la, a hii u hemben atse a i nanden iniav sha mi sha ci u mbaaôndo mbagenev kua ieev vev yô, ken tar la. Yoshia va nyer anyom 26 yô, a nôngo i hii u sôron tempel u Yehova.

Yange pristi u tamen, Hilkia za zua a ihyulenruamabera (takerada) u Atindi a Yehova, man alaghga lu ihyulenruamabera u Mose nger yô. Nahan Shafan, akawe u tor maa tôô ihyulenruamabera shon va a mi hen Yoshia, gba va ôron Atindi a i nger ker la taver taver. Yoshia ungwan yô, a nenge ér Mbaiserael hemba Yehova ato anyom ngee. Tsô Yoshia kaa a Hilkia ér: ‘Ishima vihi Yehova a vese kpishi. Yô za lam a na. Yehova una kaa se kwagh u i doo u se er yô.’ Tsô Yehova tindi profeti u kwase, Hulda za ôr ve mkaanem nam ér: ‘Ior mba ken tar u Yuda undum. Nahan m ngu tsahan ve, kpa a lu shighe u tor Yoshia a lu uma ne ga, sha ci u un yô a hide a iyol na ijime.’

Tor Yoshia yange ungwan loho la yô, kar yem ken tempel, za tindi i lôhô Mbayuda cii va zua her. Maa a ôr ve Atindi a Yehova. Nahan Yoshia kua Mbayuda cii tôndo zwa ér vea ungwan imo i Yehova a ishima ve cii.

Mbayuda yange ve kera er iniongo i Paseka ga anyom kar kpishi. Kpa Yoshia va ôron atindi la fan ér gba u a eren iniongo la ken hanma inyom  yô, a kaa a ior ér: ‘Se er nen iniongo i Paseka sha ci u Yehova.’ Tsô Yoshia kohol iyol u nan iniav kpishi, shi ver mbaatsamev ér ve waan atsam ken tempel. Maa Mbayuda er iniongo i Paseka, mba been yô, ve er Iniongo i Bredi u I We Kwa sha Mi Ga La, ayange ataankarahar. Er Samuel yange kpe je, lu hiin je shi i er iniongo i Paseka nahan ne. Yoshia yange soo Atindi a Aôndo sha mimi. Ka i doo u u henen atindi a Yehova kpa?

“Mkaanem Ou ka imenger i angahar a am, man iwanger i gbenda wam kpaa.”​—⁠Pasalmi 119:⁠105