Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 53

Yehoyada Taver Ishima

Yehoyada Taver Ishima

Yesebel yange lu a wan u kwase, iti na ér Atalia. Yange wa ifer vough er mama na Yesebel nahan. Atalia yange vôso tor u tar u Yuda. Tor la va kpen yô, wan u Atalia mar vea na la kar tema tor. Kpa wan na shon va kpe, maa Atalia iyol na kar tema tor sha Yuda. Teman tor yô, a nôngo ér una tim tsombortor u utor mba Yuda la cii. Yange wua hanma or u nenge ér nana va lu tor, a kera lu un ga yô, kua ônov mba ônov nav je kpaa. Nahan kwagh na cier hanma or iyol.

Pristi u Tamen Yehoyada vea kwase na, Yehoshabeati gema fa er kwagh u Atalia lu eren la lu ifer i vihin kpishi yô. Nahan ve cia un ga, ve yer wanikyundan u nomso ugen, iti na ér Yoashi. Lu u Atalia una fa yô, una wua ve cii. Yoashi lu wan u wan u Atalia. Yange ve lu yesen un ken tempel.

Yoashi va kuman anyom ataankarahar yô, Yehoyada lôhô mbavesen mba hemen akum a ior kua Mbalevi va kohol ken tempel, maa a kaa a ve ér: ‘Tile kuran nen ihinda i tempel, or a de karen nyôron ga.’ Yehoyada maa ver Yoashi tor sha Yuda shi cir un idyer i tor sha ityou. Tsô ior mba ken Yuda gba kuhwan tor kaan zever zever ér: ‘Tor a lu uma gbem!’

Torkwase Atalia ungwa ayôôso a ikpelaior ken tempel, maa mough fese za her. Za nengen a tor ugen u i ver la yô, a gba ôron zever zever ér: ‘I er mhen u ifer sha mo! I er mhen u ifer sha mo!’ Mbavesen mbara maa kôr torkwase u wan ifer ne, ve due a na ve za wua un. Kpa kwaghbo u yange na tar u Yuda er la di ye?

Pristi Yehoyada wase ior mba ken tar u Yuda cii ya ikyur a Yehova, shi ve tôndo zwa ér vea civir Un tseegh. Yehoyada yange na ve zwa ve yôhôr  tempel u Baal ve haa inya, shi ve hembe ieev nav avur avur. A gema a ver upristi kua Mbalevi ér ve eren tom ken tempel sha er ior vea hide a hii u civir Aôndo ker yô. Shi yange ver ior mba kuran ihinda i tempel sha er or u lun wang ga nana kar nana nyôr ker ga yô. Tsô Yehoyada man mbavesen mba hemen ior mbara yem a Yoashi ken ya u tor, ve za ver un sha ikyônough ki torough. Nahan ior mba ken Yuda ember tsung. Ve hingir u civir Yehova, ve kera lu sha ikyev i Atalia ga, shi ve de u civir Baal. U nenge er ishima i taver i Yehoyada la yange i wase ior kpishi kpa?

‘De cian nen mba ve woo iyol tseegh, kpa ve fetyô u wuan uma ga la ga; guda cia nen Un u A fetyô u timin uma kua iyol cii ken gehena la.’​—⁠Mateu 10:⁠28