Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 51

Torshoja man Anwankwase u Cuku

Torshoja man Anwankwase u Cuku

Anwankwase Iserael ugen yange za lu ken tar u Shiria, ica a tar na. Yange shoja i Mbashiria va kôr un hen ya u ter na yem a na, maa za hingir ankpan u kwase u torshoja ugen, iti i torshoja la ér Naaman. Anwankwase la yange civir Yehova, shin er ior mba lu vea ve la civir Yehova ga nahan kpaa.

Naaman yange lu a angev mbu sha kwavyolough mbu vihin tsung, shi hanma shighe yô, mbu nyoon un. Nahan sar anwankwase la tsung u wasen un. Tsô a za kaa a kwase u Naaman ér: ‘M fa or u nana bee orvesen angev yô. Profeti u Yehova ugen ngu ken Iserael, iti na ér Elisha. Una fatyô u been un angev.’

Tsô kwase u Naaman za ôr Naaman kwagh u anwankwase ne ôr la. Naaman yange kegh iyol u karen hanma twer cii, nahan a za hen ya u Elisha ken Iserael. Naaman lu henen ér Elisha una kegh un gbenda sha inja i zegeor. Kpa Elisha va iyol na va lam a Naaman ga, gema tindi wanye na ér a va kaa Naaman ér: ‘Za, za tsuwe gba shin Ifi u Yordan  kwa taankaruhar, tsô angev ou mbua bee.’

Kwagh la yange vihi Naaman kpishi. A kaa ér: ‘M hen mer profeti ne una yila Aôndo na shi una cia ave a na sha a mo maa angev av mbua bee. Kpa a gema a kaa ér m yem shin ifi u Iserael ne. Man uifi mba ken Shiria kpa hemba doon. Er nan se yem se za ôô iyol shin mô ve ga?’ Ishima yange vihi Naaman ker, maa due hen ya u Elisha hide gba yemen.

Mbatomov mba Naaman yange ve wase un u henen kwagh u a doo u una er yô. Ve pine un ér: ‘Ashen una kaa ér we u er kwagh u vesen cii man angev ou mbua bee nahan, ma u er gaa? Kwagh u profeti ne a kaa ér we u er la ka ankwagh u cuku je. Er nan u gbe eren tsô ga?’ Naaman yange ungwa kwaghwan ve la. Nahan a yem shin Ifi u Yordan a za tsuwe a gba shimi kwa taankaruhar. Naaman gbe shin mnger kwa u sha utaankaruhar la duen sha tar yô, iyol na hingir wang. Yange doo un kpishi, nahan a hide a za hen Elisha a za sugh un. A kaa a Elisha ér: ‘Hegen yô m fa, Yehova ka Aôndo u mimi.’ Zum u Naaman hide hen ya na la, u hen wer anwankwase Iserael la yange una nenge er iyol i Naaman i hingir wang nahan, a lu un ken ishima nena?

“Ka ken zwa u anikyundanev man mbamanatumba U sôr iwuese ye.”​—⁠Mateu 21:⁠16