Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 50

Yehova Nôngo Ityav sha Ci u Yehoshafati

Yehova Nôngo Ityav sha Ci u Yehoshafati

Shighe u Yehoshafati lu tor u tar u Yuda la, yange hembe atse a i nanden iniav sha mi sha ci u Baal kua ieev nav ken Yuda la cii. Yehoshafati yange soo ér ior ve fa atindi a Yehova. Nahan a tindi mbatomov nav mba vesen kua Mbalevi ér ve zende ken tar u Yuda cii ve tese ior atindi a Yehova.

Ityar igen i yange dondo a tar u Yuda la cii fa er Yehova lu a ior nav Mbayuda yô, nahan ve lu cian u tan ityav sha ve. Yange ve va a uiyua ve va na Yehoshafati je kpaa. Kpa Mbamoabi man Mbaamon kua ior mba tiôntar u Seir la mough va ér vea va nôngo ityav a tar u Yuda. Yehoshafati nenge ér gba u Yehova una wase un. Nahan a tindi i kaa nomso man kasev kua mbayev cii va kohol ken Yerusalem. Tsô a tile her atô ve cii, a er msen a kaa ér: ‘Yehova, a we shio yô, se fatyô u hemban ga. Ôr se kwagh u se er yô.’

Yehova ungwa msen la, nahan a kaa a ve ér: ‘De cian nen ga. Me wase ne. Wa nen ago iyol, tile nen ving, tsô ne nenge er me yima ne yô.’ Yehova yange yima ve nena?

Kpernan pepe maa, Yehoshafati tsua ior mba wan atsam kaa a ve ér ve kar ushoja ve yemen ve sha hemen. Tsô ve zende, hii hen Yerusalem zan zan ve za nyôr hen ijiir i nôngon ityav, i i yilan ér Tekoa la.

Mbawan atsam mbara mba ngur wan atsam genger genger wuese Yehova yô, Yehova maa nôngo ityav sha ci u ior nav. Yehova yange er Mbaamon man Mbamoabi hingir tumbuluu, maa ve hide ve gba wuan ayol a ve, or ve môm war ga. Kpa Yehova kura ior mba ken tar u Yuda man ushoja kua upristi mba ken tar la cii. Ior mba ken ityar i i dondo a tar u Yuda la cii, ungwa kwagh u Yehova er ne, nahan ve fa je ér Yehova ngu nôngon ityav sha ci u ior nav her. Yehova ka a yima ior nav nena? Ka a yima ve sha igbenda kposo kposo. Keren ér uumace ve wase un u yiman ior nav ga.

‘Ka ne né nôngo ityav mbin ga; wa nen ago iyol, tile nen ving, tsô né nenge er Yehova Una yima ne yô.’​—⁠2 Kroniku 20:⁠17