Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 45

Iserael Pav Hingir Ityar Ihiar

Iserael Pav Hingir Ityar Ihiar

Sha ayange a Tor Solomon lu civir Yehova la cii, bem lu ken tar u Iserael. Kpa Solomon va vôso kasev kpishi ken ityar igen, man lu kasev mba civir ieev. Nahan tegh tegh tsô, Solomon kpa va gema civir ieev. Kwagh ne na yô, ishima vihi Yehova. A kaa a Solomon ér: ‘Me pav Iserael una hingir avegher ahar, nahan a kera lu ken tsombor wou tseegh tor una duen ga. Me gema vegher u vesen la me na wanye wou ugen, nahan tsombor wou ua lu masen hemen vegher u kiriki la tseegh.’

Yehova yange pase kwagh u soo u eren ne wang sha gbenda ugen kpaa. Wanye u Tor Solomon ugen, iti na ér Yerobiam, yange lu zan zende, maa za zua a profeti Ahiya sha gbenda. Tsô Ahiya kôr riga na iyol na ande ker abamber 12, sha iyenge i ikwe i ônov mba Iserael vough, maa kaa a Yerobiam ér: ‘Yehova una pav Iserael una hingir ityar ihiar, nahan a kera lu or u ken tsombor u Solomon tseegh nana lu tor ga. Yô, ngohol abamber a ikyondo a pue ne, sha ci u u ngu va lun tor u ikwe i pue.’ Tor Solomon ungwan kwagh ne yô, a soo u wuan Yerobiam! Yerobiam maa yevese yem ken Igipiti. Shighe karen yô, Solomon kpe, maa wan na Rehobiam tema tor. Tsô Yerobiam nenge ér hegen una hide ken Iserael kpa kwagh a kera er un ga.

 Tsô mbatamen mba ken Iserael za kaa a Rehobiam ér: ‘Aluer u er a ior dedoo yô, vea za hemen u ungwan we.’ Kpa agumaior a sha kwav u Rehobiam, a yange lu azende a na yô, gema kaa a na ér: ‘De eren kwagh a ior ken bem ga! Na ve ve ya ican i hemba ave a tse!’ Rehobiam yange ungwa kwaghwan u mbakwav na, mba ve lu azende a na la. Nahan a er ior ican tsung. Kwagh ne na yô, Mbaiserael hendan a na. Tsô ve ver Yerobiam tor sha ikwe i pue la. Nahan i va gema yilan ikwe i pue ne ér tar u Iserael. Ikwe i ihiar la di i gema yilan i ér tar u Yuda. Ve yô, ve hendan a Tor Rehobiam ga. Nahan ikwe 12 i ônov mba Iserael la pav hingir ityar ihiar.

Yerobiam yange soo ér ior nav ve zaan ve za civir Yehova ken Yerusalem, u lu ken tar u Rehobiam la ga. U fa ityôkyaa kpa? Yerobiam yange lu cian ér ior nav vea va undu un vea za kohol Rehobiam. Nahan Yerobiam er ieev mbi anibuav ihiar sha zenaria, maa kaa a ior nav ér: ‘Yerusalem gba ica yum. Civir nen Aôndo heen.’ Tsô ior hii u civir ieev mbi anibuav mba sha zenaria mbara, shi ve undu Yehova kwa ne kpaa.

“I̱ de zough ne ken mzough u kpeegh sha igbur i môm a or u nan ne jighjigh ga, imôngo ga. Gadia perapera zua vea ifer sha nyi? . . . Shin ka sha nyi man kwagh u or u nan ne jighjigh a zua a u nan ne jighjigh ga laa?” ​—⁠2 Mbakorinte 6:​14, 15