Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 46

I Zua sha Uwo u Karmel Ér a Fa Aôndo u Mimi

I Zua sha Uwo u Karmel Ér a Fa Aôndo u Mimi

Utor kpishi mba yange ve hemen tar u Iserael u ikwe pue la, lu mbawan afer. Kpa Ahaba lu môm ken utor mba ve hemba wan afer yô. Yange vôso kwase u wan ifer tsung, u civir Baal yô. Iti i kwase na shon ér Yesebel. Ahaba man Yesebel yange ve samber a mcivir u Baal ken tar la cii, shi ve wua uprofeti mba Yehova. Nahan Yehova er nena? Yange tindi profeti Eliya ér a za ôr Ahaba loho ugen.

Eliya kaa a Tor Ahaba ér, ngu eren aferakaa, nahan ura ua kera nôô ken Iserael ga. Tsô ura kera nôô ga hemba anyom atar. Hen shighe la cii, iyiav kera mende ga, nahan ijen gba ken tar la kpishi. Shighe karen yô, Yehova hide tindi Eliya hen tor Ahaba. Ze yô, Tor Ahaba kaa a na ér: ‘We or u nzughul a ior ne! Zayol ne cii ka we u ve a mi ye!’ Eliya gema kaa a na ér: ‘Ka mo m ne ura u de u nôôn ga. Kpa ka we, sha ci u u ngu civir Baal. De se kar tsô se fa Aôndo u a lu u mimi la. Kohol Mbaiserael man uprofeti mba Baal cii sha Uwo u Karmel.’

Tsô ior kohol sha uwo la. Eliya maa kaa ér: ‘Tsua nen kwagh u ne soo la. Aluer ka Yehova a lu Aôndo u mimi yô, dondo nen un. Kpa aluer ka Baal yô, dondo nen un. Se kar tsô se fa. M soo mer uprofeti mba Baal mba 450 mbara, ve̱ sôngo naagh ve̱ ver sha atse a nanden naagh, ve̱ yila aôndo ve, mo di kpaa me sôngo naagh me ver, me yila Yehova. Nahan Aôndo u una tindi usu ua hia naagh la, ka un a lu Aôndo u mimi ye.’ Ior cii lumun.

Tsô uprofeti mba Baal sôngo naagh ver. Ve hide ve gba yilan aôndo ve kaan ér: ‘Baal, ungwa se!’ Ve hii u yilan Baal pepe zan zan atetan, kpa Baal ungwa ga. Tsô Eliya gba nahan ve tar, kaan ér: ‘Yila nen un i taver er ne fetyô la cii. Alaghga ngu yaven, saa or a nder un.’ Uprofeti mba Baal yila Baal zan zan aikighe. Kpa Baal ungwa ga.

Tsô Eliya sôngo naagh nagh penda sha atse a nanden naagh, a haa mngerem sha atse shon iv poo. Maa a er msen a kaa ér: ‘Yehova, wea lumun yô, na ior mban ve fa er u lu Aôndo u mimi yô.’ Fese je maa Yehova er usu sen sha va hia naagh kura. Tsô ior ger amo kaa ér: ‘Yehova ka Aôndo u mimi!’ Eliya maa kaa ér: ‘Kôr nen uprofeti mba Baal mbara cii, mô ve nana de osough ga!’  Nahan sha iyange shon la je, i wua uprofeti mba Baal mba 450 mbara cica cii.

Eliya va nengen ibeenegh ki cuku ki hiin u duen sha kwavaôndo yô, a kaa a Ahaba ér: ‘Zegeura ngu van. Unde sha ikyekyeutya you, yem ken ya.’ Ica i gbe ga yô, abeen cir sha, kwavaôndo wa ime, tsô ahumbe gba toron, zegeura maa hii u nôôn. Tsô ura hide hii u nôôn ken tar u Iserael. Ahaba yange yevese a ikyekye sha agee a na cii. Kpa Yehova wase Eliya, a yevese angahar a za kar Ahaba! Nahan mbamzeyol mba Eliya cii bee hen shighe laa? De se nenge.

‘Ior ve̱ fa er We, u i yer iti You er Yehova la, i lu We tseegh U lu Aôndo u Hemban Sha, sha tar cii yô.’​—⁠Pasalmi 83:⁠18