Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 49

I Tsaha Torkwase u Wan Ifer

I Tsaha Torkwase u Wan Ifer

Tor Ahaba yange a ta ashe sha windou u iyou na, hen geri u Yesereel, a kenger sule u wain u orgen, iti na ér Naboti. Ahaba yange soo ér sule la u lu u na, nahan a nôngo ér una yam u hen Naboti. Kpa Naboti venda u teen un, sha ci u Yehova yange wa Tindi ér or a de teen sule u dyako ga. Nahan Naboti soo u peren tindi la ga. Kwagh u Naboti er ne lu shami. Nahan Ahaba na un icivir kpa? Ei. Yange ishima vihi un tsung. A nyoon ishima je a nyôr ken iyou a venda u duen ken won, shi soo u yan kwagh kpaa ga.

Tsô Torkwase Yesebel, kwase u Ahaba u wa ifer kpishi la, kaa a Ahaba ér: ‘We u ngu tor u Iserael. Nahan u fatyô u lun a hanma kwagh u u soo cii. Mo me na u sule la.’ Yesebel maa nger uwashika tindi a mi hen mbavesen mba hen geri u Yesereel la, kaa ker ér ve wa Naboti kwagh iyol ér a tuhwa Aôndo, nahan ve ta un awen a kpe. Tsô mbavesen mbara er kwagh u Yesebel kaa ér ve er la. Yesebel maa kaa a Ahaba ér: ‘Naboti kpe hegen! Nahan sule la hingir u wou.’

Yesebel yange wua Naboti, or u lun a ishô la tseegh ga, a wua mbagenev kpishi a ishô ve iyol. Yange wua ior kpishi mba Yehova doo ve ishima yô. Yesebel yange civir akombo shi eren afer agen kpaa. Yehova lu nengen afer a Yesebel lu eren la cii. Una er a Yesebel nena?

Yange Ahaba va kpen kera yô, wan na Yehoram kar tema tor. Kpa Yehova tindi orgen ér a za tsaha Yesebel a tsombor na cii. Iti i or shon ér Yehu.

Tsô Yehu henda ikyekyeutya na gba yemen ken Yesereel, ape Yesebel lu la. Yehoram di gema mough sha ikyekyeutya na va kohol Yehu sha gbenda, pine un ér: ‘Ka bem kpa?’ Yehu kaa a na ér: ‘Er mama wou Yesebel a lu eren afer ne, bem una lu ga.’ Maa  Yehoram hii ér una goom a ikyekyeutya na una yevese a yem. Kpa Yehu ta un ivaan, maa a kpe her je.

Yehu maa kar gba yemen hen ya u Yesebel. Yesebel ungwan ér Yehu ngu van yô, a za kura ityough shi a shighe akaa sha ishigh, a hide a tema hen kpe windou sha kpoyou na u sha, lu keghen shi gban ashe. Yehu va nyer yô, a sugh un sha ilyahan. Yehu maa genger imo kaa a mbatomov mba Yesebel mba ve tile hen ape tema hen kpe windou la ér: ‘Kôr un kende nen shin inya.’ Tsô ve kôr Yesebel ve ker sha windou due va gba shin inya, maa a kpe her je.

Yehu wuan Yesebel kera yô, hide shi wua ônov mba Ahaba mba nomso 70, shi venda i de u civir Baal ken tar u Iserael. U nenge er Yehova a fe hanma kwagh, shi ka a tsaha ior mba ve eren afer la kpa?

“Dyako u i ye fefa sha hiihii la, mkur na yô, una lu a iveren ga.”​—⁠Anzaakaa 20:⁠21