Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 31

Yosua man Mbagibeon

Yosua man Mbagibeon

Akuraior agen ken tar u Kanaan yange ungwa kwagh u er gar u Yeriko la. Nahan utor vev zua zwa ér vea nôngo ityav a Mbaiserael. Kpa Mbagibeon er mhen ugen kposo. Yange ve hua akondo a anden ve za hen Yosua, ve za kaa a na ér: ‘Se due ken tar u icaa tsung je. Se ungwa kwagh u Yehova, kua akaa a a er sha ci wen ken tar u Igipiti man tar u Moabi la cii. Yô tôndo nen zwa a vese ner ne er se kwagh ga, nahan se hingir ikpan yene.’

Yosua yange na ve jighjigh, shi tôndo zwa ér una er ve kwagh ga. Ayange atar nga karen yô, Yosua mase fan er ior mbara ve due ken tar u icaa ga yô. Ve lu ior mba ken tar u Kanaan. Tsô Yosua yila Mbagibeon mbara pine ve ér: ‘Er nan ve ne tsugh se nahana?’ Ve kaa a na ér: ‘Yange cier se iyol! Se fa Yehova Aôndo wen ngu nôngon ityav sha ci wen. Nea lumun yô, de wuan nen se ga.’ Nahan Yosua er kwagh u tôndo zwa a ve la, de ve ve lu her.

Ayange nga karen kpuaa yô, utor utaan mba ken Kanaan kohol ushoja vev, ve mough ve yem u za tan num sha Mbagibeon. Maa  Yosua mough a shoja na u za wasen Mbagibeon. Ve tsa yemen tugh kaka. Kpernan pepe pepe maa ityav hii. Mbakanaan mbara haa ayem, gba yevese yemen hanma vegher cii. Kpa hanma ijiir i ve lu yevese zan cii yô, Yehova er awen a vesen sen va ta ve wua. Tsô Yosua kaa a Yehova ér a kôr iyange i tile gigh gigh. Shighe môm je kpa iyange vande tilen gigh gigh ga, kpa er nan ve Yosua yange kaa a Yehova ér a er kwagh nahana? Ka sha ci u Yosua yange na Yehova jighjigh kpishi. Tsô iyange tile gigh gigh, i kera mire ga kuma er iyange jimin nahan, zan zan Mbaiserael kar hemban utor mba Kanaan kua ushoja vev cii ityav.

“‘Een’ wen a̱ lu ‘een’ heregh, man ‘ei’ wen kpaa, a̱ lu ‘ei’ heregh. Kwagh u una seer sha mban yô, ka u a dugh ken ifer je la.”​—⁠Mateu 5:⁠37