Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 30

Rahabi Yer Mbamkerev Mbara

Rahabi Yer Mbamkerev Mbara

Mbamkerev mba Yosua tindi la yange mba za nyer ken gar u Yeriko yô, ve kar ve za tsa hen ya u kwase ugen, iti na ér Rahabi. Kpa tor u Yeriko va fa, nahan a tindi ushoja hen ya u Rahabi. Rahabi maa yer mbamkerev mba uhar mbara sha haav mbu iyou na, hide tese ushoja mbara gbenda ugen sha er vea zua a mbamkerev mba shon ga yô. A kaa a mbamkerev mbara ér: ‘Me wase ne sha ci u m fa Yehova ta ikyaa a ven, shi ne mba ngohol tar ne. Nea lumun yô, tôndo nen zwa a mo ner ne war tsombor wam.’

Mbamkerev mbara gema kaa a Rahabi ér: ‘Se mba tôndon zwa a we ser, zum u se va u timin gar ne yô, kwagh a er or môm u nan lu ken iyou you ne ga.’ Shi ve kaa ér: ‘Zer kor u nyian sha windou wou, tsô tsombor wou ua war.’

Rahabi yange ta kor sha windou na sen ken won, nahan mbamkerev mbara hungwa sha u. Maa ve za yer sha iwo zan zan ayange atar cii ve, ve mase hiden yemen hen Yosua ye. Tsô Mbaiserael per Ifi u Yordan gba  wan iyol i ngohol tar la. Ka gar u Yeriko je yange ve hii hemban un ityav ye. Yehova yange kaa a ve ér, hanma iyange yô, ve zende ve ningir gar la kwa môm, ve er nahan zan zan ayange ataratar. Nahan ve er kwagh ne, ka gbe iyange i sha utaankaruhar yô, ve ningir gar shon kwa taankaruhar. Tsô upristi tôngo ikyor, ushoja di gbire ivaa taver taver. Girgar maa yôhôr haa inya! Kpa iyou i Rahabi, i i lu sha girgar la yô, i yôhôr ga. Yange Rahabi kua tsombor na cii war sha ci u ve na Yehova jighjigh.

“Rahabi . . . kpaa, kape i na un ishô sha aeren je la gadia a nyôr a mbatyomov man a due a ve sha gbenda ugen kposo.”​—⁠Yakobu 2:⁠25