Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 36

Ityendezwa i Yefeta

Ityendezwa i Yefeta

Yange Mbaiserael shi undu Yehova hide lu civir mbaaôndo mbaaiev. Mbaamon yange vea va ta ityav sha Mbaiserael kpa, mbaaôndo mbaaiev mbara ve wase Mbaiserael cuku tsô kpaa ga. Nahan ve ya ican anyom kpishi. Ken masejime yô, ve zamber a Yehova ér: ‘Se er kwaghbo. Wea lumun yô, yima se sha ikyev i mbaihyomov asev.’ Mbaiserael maa haa mbaaôndo vev mbara kera, hide shi gba civir Yehova. Yehova yange soo ér ve zer yan ican sha ashe a na gbem ga.

Nahan a tsua orshoja ugen ér nana hemen Mbaiserael ve za nôngo ityav a Mbaamon. Iti i orshoja shon ér Yefeta. Yange kaa a Yehova ér: ‘Aluer u wase se se hemba ityav mbin yô, m ngu tôndon zwa a we mer, me hiden me va nyôron hen ya wam yô, or u nan hii  duen hen ya va keghen mo gbenda cii me na u.’ Yehova ungwa msen u Yefeta ne, shi wase un hemba ityav mbira.

Yefeta za hiden va nyôron hen ya yô, lu wan na u kwase hii duen va keghen un gbenda ye, man lu wan na cii je la. Lu kuhwan angenga vinen amar. Yefeta una er nena? Yange umbur ityendezwa i a er la, maa a kaa ér: ‘Aye, wan wama! U wuam ve. M er ityendezwa a Yehova. Man kwagh ugen u me er ve me kure ityendezwa shon ngu ga, saa me na u u hingir u za eren tom ken tabernakel, ken Shilo.’ Kpa wan na u kwase la gema kaa a na ér: ‘Baba, wea tôndo zwa a Yehova yô, a gba u u kure ityendezwa shon. Kpa wea lumun yô, me mase lun vea kasev mba ve lu azende am la sha iwo iwer ihiar tseegh, tsô me yem.’ Wan u Yefeta u kwase la yange za er Yehova tom ken tabernakel sha mimi zan zan kar kpen. Hanma inyom yô, yange azende a na a za hen a na ken Shilo.

“Or u wan u nan u nomso shin u kwase a hembe doon nan ishima a Mo yô, nan kumam ga.” ​—⁠Mateu 10:⁠37