Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 24

Ve Kera Er Kwagh u Ve Tôndo Zwa la Ga

Ve Kera Er Kwagh u Ve Tôndo Zwa la Ga

Yehova yange kaa a Mose ér: ‘Va hen a mo sha uwo heen. Me nger atindi am sha ikpande awen me na u.’ Mose unde yem sha uwo za lu sha mi kuma ayange 40. Hen shighe la, Yehova nger Atindi Pue sha ikpande awen ihiar, na Mose.

Shighe kar yô, Mbaiserael hen ér Mose undu ve yem kwagh na. Tsô ve kaa a Aron ér: ‘Se soo u lun a or u nana hemen se yô. Nahan er se aôndo u se civir yô!’ Tsô Aron kaa a ve ér: ‘Va nam nen zenaria.’ Mba ve a zenaria la yô, Aron wa un ken usu maa sough hingir nyeregh. Aron maa er wanbua a mi. Tsô ior kaa ér: ‘Wanbua ne ka Aôndo wase u a due a vese ken Igipiti je ne!’ Maa ve hii u civir wanbua shon, shi ve er iniongo. Kwagh u ve er la lu kwaghboo? Een, sha ci u yange ve tôndo zwa ér vea civir Yehova tseegh. Kpa hen shighe ne, ve kera er kwagh u ve tôndo zwa la ga.

Yehova yange nenge kwagh u ve lu eren la, nahan a  kaa a Mose ér: ‘Hungwa za ape ior ou ve lu la. Mba hemban mo ato shi civir aôndo u aiegh.’ Tsô Mose hungwa sha uwo fese, a ikpande awen la ken ave.

Mose va zurum hen afo yô, a ungwa ior mbara lu wan atsam. Shi a nenge ve lu vinen amar shi guren civir wanbua la. Yange ishima vihi Mose kpishi. Nahan a pase ikpande awen i ihiar la cii osough ta inya, i hembe avur avur. Shi a kar fese a za vihi eev mbu wanbua la kera. Tsô a pine Aron ér: ‘Ior mban ôr a we ér nyi ve i kuma u, u er imba kwagh i vihin tsung ne nahana?’ Aron gema kaa ér: ‘De vihin ishima ga. U lan ior mban ga. Yange ve soo u lun a aôndo, nahan m wa zenaria ve ken usu, maa a sough a hingir nyeregh, m er ve wanbua ne a mi ye!’ Aron yange ma er kwagh la ga. Tsô Mose hide unde sha uwo za zamber a Yehova ér a de ior mbara kwaghbo ve.

Yehova de ior mba yange ve kegh iyol u ungwan imo na la kwaghbo ve. U nenge er yange lu hange hange u Mbaiserael vea dondo hemen u Mose kpa?

“Zum u wea [tsegha] zwa sha ishigh ki Aôndo yô, de kera ngôôr u eren sha mi ga, gadia doo Un a abumeaior ga; yô, er kwagh u u tsegh zwa sha mi la.”​—⁠Orpasenkwagh 5:4