Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 28

Jaki i Balaam Ôr Kwagh

Jaki i Balaam Ôr Kwagh

Yange Mbaiserael tsa ken ikyôngo nôngo u kuman anyom 40. Hen shighe ne, ve hemba ugeri kpishi ityav. Nahan ve za haa afo hen ukpuunkpuun mba Moabi. Ijiir ne ngi Ifi u Yordan vegher u sha ityoughkitaregh. Shighe ne, lu kuman u vea nyôr ken Tar u Ityendezwa la. Nahan lu cier Balaki, tor u Mbamoabi iyol, ér vea va ngohol un tar. Tsô a tindi loho hen orgen ér a va ken Moabi a va wa Mbaiserael ifan. Iti i or la ér Balaam.

Kpa Yehova kaa a Balaam ér: ‘De we Mbaiserael ifan ga.’ Nahan Balaam venda u zan. Tsô Tor Balaki shi tindi loho sha kwa har ér Balaam a va, shi tôndo zwa ér una na un hanma kwagh u a soo cii. Kpa Balaam shi venda. Tsô Aôndo kaa a Balaam ér: ‘U fatyô u zan, kpa za ôr kwagh u me kaa u tseegh.’

Tsô Balaam mough henda jaki na gba zan ken Moabi. Yange wa ishima ér una za wa Mbaiserael ifan, shin er Yehova kaa ér a er nahan ga kpaa. Balaam ngur yemen yô, ortyom u Yehova ande hen a na sha gbenda kuma kwa tar. Balaam fatyô u nengen a ortyom la ga, kpa jaki na yô, nenge a ortyom shon. Kwa u hiihii la, jaki nenge a ortyom maa i̱ tume ken toho. Kwa u sha uhar la, jaki shon lu palegh ortyom la, karen kôôn iyol ken kpekpe u i maa sha awen yô, maa i̱ kighir Balaam nguhar ken kpekpe shon. Kwa u masetyô la, jaki nenge a ortyom la maa i shir i yav inya sha atô gbenda jigh jigh. Hanma kwa cii yô, Balaam yange a gema aga a gbidye jaki la.

Balaam gbidyen jaki la sha kwa tar yô, Yehova na jaki shon ôr kwagh. Jaki pine Balaam ér: ‘Er nan u zer gbidyen mo nahana?’ Balaam gema kaa ér: ‘U ngu heen mo. Mea lu a sanker yô, ma m wua u.’ Jaki la gema kaa a Balaam ér: ‘U hendam anyom imôngo hegen. M vanden eren imba kwagh ne a wee?’

Yehova maa bugh Balaam ashe, nahan a nenge a ortyom la. Ortyom la kaa a Balaam ér: ‘Yehova ta u icin ér u de we Mbaiserael ifan ga.’  Balaam gema kaa ér: ‘M er kwaghbo. Me hide me yem ken ya wam.’ Kpa ortyom la kaa a na ér: ‘Za ken Moabi, kpa i lu kwagh u Yehova a kaa u la tseegh, ôr ye.’

Balaam yange hen kwagh ken kwagh ne je he? Ei. Shighe kar yô, Balaam nôngo kwa tar ér una wa Mbaiserael ifan, kpa hanma kwa yô, Yehova na Balaam gema ver Mbaiserael doo doo. Ken masejime yô, Mbaiserael ta num sha Moabi, nahan i wua Balaam kpaa. Hemba doon u Balaam yange ma hii ungwan imo i Yehova ga he?

“Ver nen ishima, kura nen ayol a en sha hanma hua; gadia ka sha u ngeen a akaa kpishi la man or nana lu a uma ga.” ​—⁠Luka 12:⁠15