Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 14

Kpan Ugen u Ungwan Imo i Aôndo Yô

Kpan Ugen u Ungwan Imo i Aôndo Yô

Yosev lu môm ken ônov mba Yakob mar ken iyolbeen yô. Anngôôv mba Yosev mba vesen nenge ér ter ve hemba soon un a ve mbagenev cii. U hen wer yange a lu ve ken ishima nena? Yange ve gba Yosev iyuhe shi ve kôr un ihyom. Shighe ugen la mnyam cier Yosev sha gbenda u kpiligh iyol kpishi. Mnyam mara lu tesen ér iyange igen vea gure inya vea na un icivir. Maa ve hemba kôron un ihyom cii!

Iyange igen anngôôv mba Yosev lu kuran ilev ikyua a gar u Shekem. Tsô Yakob tindi Yosev ér a za nenge er ve lu yô. Yosev za aren hen ijiir la yô, ve ta ashe ve nenge a na lu van ken ica, maa ve kaa a ayol a ve ér: ‘Ormnya la ngura van la. Se wua nen un!’ Yosev va nyôron yô, ve kôr un ve kende shin ihyungwa i zan kweng. Kpa Yuda, anngô na ugen kaa ér: ‘Se wua nen un ga. De se tee nen un a za lu kpan.’ Tsô ve gema un ve tee Mbamidian mba zenden kasua mba ve lu zan ken Igipiti yô, sha agbenger a azurfa 20.

Anngôôv mba Yosev maa tôô riga na wa shin awambe a ivo i ve sôngo yô, maa ve dugh riga shon ve na i za a mi hen ter ve, ve kaa ér i za pine un ér: ‘Riga ne ka u wan wou shin ka u na ga?’ Yakob kaven riga shon yô, a hen ér inyamkyume wua Yosev. Nahan a vaa tsung. Or môm fatyô u surun un ishima ga.

Mba za nyer a Yosev ken Igipiti yô, i gema un i tee, za lu kpan u orvesen ugen hen ya u tor, i yilan un ér Potifar. Kpa Yehova lu a Yosev. Potifar nenge Yosev fa tom na tsembelee shi lu a jighjigh iyol. Ica kera gba ga je maa Potifar gema akaa a na cica cii wa Yosev sha ikyev.

Kwase u Potifar nenge Yosev doo or shi taver iyol kpishi. Nahan a zer  zan Yosev iyol ayange ayange ér a yav a na. Yosev una er nena? Yosev venda, kaa a na ér: ‘Ei! Kwagh ne ka kwaghbo. Orvesen wam nam jighjigh, man we u gema u ngu kwase na. Aluer m yav a we yô, a lu isholibo sha ishigh ki Aôndo!’

Iyange igen kwase u Potifar nôngo ér una kôr Yosev sha apera, a yav a na. A gba Yosev uwegh sha ikyondo, kpa orti osough yevese. Potifar za hidi hen ya yô, kwase na kera ôr un kwagh u mimi ga, gema kaa ér Yosev kôr un ér una yav a na sha agee. Yange ishima vihi Potifar tsung, nahan a wuhe Yosev ken gaadi. Kpa kwagh u Yosev hungur Yehova ga.

“Hide nen a ayol a en ijime er uwegh ku Aôndo ku ageegh ku lu sha a ven nahan, sha er shighe á va kuma vough yô Una kende ne sha.”​—⁠1 Peteru 5:6