Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 17

Mose Tsua u Civir Yehova

Mose Tsua u Civir Yehova

Yange i va gema yilan tsombor u Yakob ken Igipiti ér Mbaiserael. Yakob man Yosev yange mba kpen kera yô, Farao u he tema tor. Ishima lu nyian un ér Mbaiserael mba ngeen hemban Mbaigipiti. Farao ne maa gema Mbaiserael hingir ikpan. Lu kighir ve ve lu tan akam shi eren ityom i ken ityev sha ican. Kpa er Mbaigipiti lu seer Mbaiserael ican la, Mbaiserael di lu maren seer a seer. Farao yange soo ér ve ngee ga, nahan a wa tindi ér Mbaiserael vea mar wan u nomso yô, i wua kera. U nenge er yange kwagh ne una cier Mbaiserael iyol kpa?

Hen shighe ne, kwase Iserael ugen, iti na ér Yokebedi, yange mar wan u nomso u doon ashe tsung. Maa gema un wa shin ikyese, tôô yem a mi za yer ken awoo (shin ikyenaikya) hen kpeifi u Nil. Miriam, oryese na la di gema tile her ikyua lu nengen kwagh u una er yô.

Tsô wan u Farao u kwase za va shin uwar u va ôôn iyol maa nenge a ikyese la. Bughun yô, a nenge wanikyundan lu vaan, nahan kunya kôr un a na. Tsô Miriam pine un ér: ‘M za yila kwase u  nana naan wan ne atumba sha ci wou yôô?’ Wan u Farao u kwase la kaan ér een yô, Miriam za va a mama u Mose kpôô kpôô, ka Yokebedi je la. Wan u Farao u kwase la maa kaa a na ér: ‘Tôô wan ne, naan un atumba sha ci wam, nahan me kimbi u injar you.’

Wan la vesen yô, Yokebedi va a na va na wan u Farao u kwase la, maa a ii un iti ér Mose, shi yese un hingir wan na. Mose vese hingir wan u tor, shi lu sha ian i lun a hanma kwagh u yange soo cii. Kpa mayange Mose hungur Yehova ga. Yange fa dedoo ér un ngu Oriserael, un ngu Origipiti ga. Nahan a tsua u civir Yehova.

Shighe u Mose lu anyom 40 la, soo ér una wase ior nav. Nahan zum u Mose nenge Origipiti lu gbidyen kpan ugen u lu Oriserael yô, Mose gbidye Origipiti la je wua. A tôô ikyom i or shon a ii shin waarawa. Farao va fe kwagh u Mose er ne yô, a ker gbenda u wuan Mose. Mose maa yevese yem ken tar u Midian. Kpa Yehova nenge sha a na doo doo ken tar la.

“Ka sha jighjigh u nan man Mose er a vese a kera lumun u i̱ yila un ér wan u Wanfarao ga ye. Lu un guda u i̱ er a na dang a nongoior u Aôndo imôngo.”​—⁠Mbaheberu 11:​24, 25