Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 18

Ageva u Yeghen Usu

Ageva u Yeghen Usu

Mose yange tsa ken Midian anyom 40. Yange er kwase ker shi mar ônov kpaa. Tsô iyange igen Mose lu kuran ilev nav ikyua a Uwo u Senai, maa nenge a kwagh u kpiligh un iyol. Ageva lu yeghen usu, kpa gema lu hian ga! Mose ngur kporom her sha u una nenge er i hii ve kwagh a lu nahan yô, a ungwa imo ken ageva la, i kaa a na ér: ‘Mose! De ve ikyua ga. Tsua akôv shin angahar kera sha ci u u tile ka hen icighanjiir.’ Lu Yehova tindi ortyom na lu va lamen a Mose ye.

Yange cier Mose iyol, nahan a yisa ishigh nagh. Imo la kaa ér: ‘M nenge ican i Mbaiserael ve lu yan la. Me yima ve sha ikyev i Mbaigipiti shi me va a ve ken tar u doon. Ka we je u hemen ior av u due a ve ken Igipiti kera ye.’ U hen wer yange kwagh la una kpiligh Mose iyol ga he?

Mose kende pine ér: ‘Aluer ior mbara za pinem or u nan tindim yô, m kaa ve mer nyi?’ Aôndo kaa a Mose ér: ‘Kaa ve wer ka Yehova, Aôndo u Aberaham, man Aôndo u Isaka man Aôndo u Yakob a tindim hen a ven ye.’ Tsô Mose pine ér: ‘Aluer ior mbara venda u keghen ato a mo di ye?’ Yehova maa tese Mose ikyav i taver un ishima ér Una wase un. A kaa a Mose ér a gema gbough ku a lu a mi la a kende hen inya. Mose kenden ku yô, ku hingir iyô! Mose ze uwegh kôron iyô la shin tsa yô, iyô shon hide hingir gbough her. Yehova kaa ér: ‘Aluer u za er nahan yô, kwagh ne una tese ér m tindi u.’

Mose gema kaa ér: ‘M fa kwaghôron ga.’ Kpa Yehova tôndo zwa a na ér: ‘Mo me ôr u kwagh u u ôr yô, shi me tindi anngôu Aron una wase u.’ Mose nengen ér Yehova ngu a na yô, a mough vea kwase na kua ônov nav mba nomso, a hide a gba yemen ken Igipiti.

“Asema a̱ de nyian ne sha inja kwaghôron i né ôr, shin sha kwagh u né kaa ga, gadia hen shighe la je á na ne kwagh u né ôr yô.”​—⁠Mateu 10:⁠19