Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 20

Atsan Agen Ataratar Dondo

Atsan Agen Ataratar Dondo

Yange Mose man Aron za ôr Farao loho u Aôndo ér: ‘U de ior av vea yem ga yô, me va a akughô sha tar u Igipiti cii.’ Akughô ka a lu er iji nahan, kpa ka a kehe i hemba iji, shi a nyuma i nyoon tsung. Yange akughô nyôr ken ayou a Mbaigipiti cii, mbaatsanev kua mbanyarev kpaa cica. Tar la iv a akughô. Kpa hen haregh u Gosen, ape Mbaiserael lu la yô, akughô lu ga. Ican i sha unyiin ne, kua atsan a dondon la cii lu Mbaigipiti tseegh a er ve ye. Farao zamber a Mose kaa ér: ‘Zamber a Yehova a kura akughô ne kera? Tsô ior ou vea yem.’ Kpa Yehova kuran akughô la kera yô, Farao kera nyôr ityough ga. Farao una tsa a kav er ityough ki taver nagh kira kia wase un ga je kpa?

Yehova shi kaa ér: ‘Aluer Farao de ior av yem ga yô, uzendenya mba Mbaigipiti cii vea gba angev vea kpe.’ Kpernan maa uzendenya hii u kpen. Kpa Mbaiserael yô, uzendenya vev kpe ga. Nahan cii kpa Farao cighir ishima her, a lumun ér Mbaiserael ve yem ga.

Tsô Yehova kaa a Mose ér a hide a za hen Farao a za tsenda mtwem sha ahumbe. Mose za eren nahan yô, mtwem mara maa hingir ihyundu. Ihyundu shon samber sha ahumbe cii shi i haa hanma Origipiti iyol. Ihyundu ne na atundu shin avav a nyoon tsung gba Mbaigipiti cii iyol kua uzendenya vev kpaa. Nahan cii kpa, Farao venda u nan Mbaiserael gbenda ér ve yem.

Yehova shi tindi Mose hide za hen Farao, za kaa a na ér: ‘U ngu vendan di her tsô wer ior av ve de  yemen ga zee? Yô kper la, ura u awombogh ua nôô sha Igipiti.’ Kpernan maa Yehova nôô ura u awombogh, lu duran shi nyiar je usu nungwa sha awombo. Lu ura u awombogh u vihin tsung. Imba ura ne lu a vande nôôn ken tar u Igipiti ga. Ikyon man iyiav cii saa ishe, kpa hen haregh u Gosen la yô, kwagh zayol ga. Tsô Farao kaa a Mose ér: ‘Zamber Yehova a er ura ne u tôndo! Yô yem nen.’ Kpa ura la ngu tôndon a tôndo nahan Farao hide cighir ishima her.

Tsô Mose shi kaa a na ér: ‘Hegen yô, ikyomon ia ya hanma imendenegh ki awombo a vihi i shi cii.’ Maa ikyomon va umiliôn imôngo va ya hanma kwagh u yange shi ken ishule man ken akôngo kua sha ikyon cii. Tsô Farao zamber a Mose ér: ‘Zamber Yehova a kura ikyomon la sha.’ Kpa Farao cighir ishima her, shin er Yehova va kura ikyomon la sha nahan je kpaa.

Yehova shi kaa a Mose ér: ‘Naregh uwegh ou sha.’ Mose nalegh yô, fese je maa kwavaôndo cii wa ime mgbigh mgbigh. Ayange atar cii Origipiti môm fatyô u nengen a or shin ma kwagh môm ga. Lu Mbaiserael tseegh lu a iwanger hen uya vev ye.

Tsô Farao kaa a Mose ér; ‘We kua ior ou cii yem nen. Kpa undu nen ilev man uzendenya enev cii her.’ Mose gema kaa a na ér: ‘Gba u se yemen a uzendenya asev sha ci u ka ve se va za na Aôndo wase nagh a mi ye.’ Maa ishima vihi Farao. A nande a Mose a kaa ér: ‘Yem heen kera! Me kimbir nengen a we me wua u.’

“Né gema né kav mkposo u orperapera a iferor, man u or u civir Aôndo a or u civir Un ga la.”​—⁠Malaki 3:⁠18