Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 19

Atsan Atar a Hiihii

Atsan Atar a Hiihii

Yange i kighir Mbaiserael ve lu eren tom u kpan sha ican tsung. Nahan Yehova tindi Mose man Aron hen Farao, ér ve za kaa un ér: ‘Na ior av gbenda ve yem, sha er vea za civir mo ken taaikyôngo yô.’ Farao venda sha cihi je, a kaa ér: ‘Kwagh gbam sha kwagh u Yehova a kaa la ga, shi m ngu nan Mbaiserael ian mer ve yem ga.’ Farao maa seer ve tom u ve lu eren sha ican la. Yehova maa tsaha Farao sha u a de hendan a na ga yô. U fa gbenda u Yehova tsaha un kpa? Yange va a Atsan Pue sha Igipiti. Yehova kaa a Mose ér: ‘Farao soo u ungwan imo yam ga. Kper pepe una za shin Ifi u Nil. Nahan za kohol un shimi, kaa a na wer, er a venda ér ior av ve de yemen ga yô, mngerem ma shin Ifi u Nil cii ma a hingir awambe.’ Tsô Mose za hen Farao er Yehova kaa un nahan. Farao nenge sha ashe na, er Aron gema aga na gbidye mngerem ma shin Ifi u Nil, maa ifi shon cii hingir awambe yô. Ifi la huma, ishu i shimi cii kpe, shi or kera fatyô u man mngerem ma shin Ifi u Nil ga. Nahan cii kpa Farao venda u nan Mbaiserael gbenda ér ve yem.

 Ayange nga karen ataankarahar yô, Yehova shi tindi Mose ér a hide a za kaa Farao ér: ‘Aluer u na ior av ian wer ve yem ga yô, tar u Igipiti ua iv a asôhô.’ Kpa Farao lumun ér Mbaiserael ve yem ga. Tsô Aron kende a aga na sha, maa asôhô due cir kpuruaa ken Igipiti cii. Ior lu nengen a asôhô ken ayou a ve man sha ugambe vev kua shin mkam vem kpaa. Asôhô lu hanma ijiir cii! Tsô Farao kaa a Mose ér a zamber Yehova a kar a ican ne kera. Farao tôndo zwa ér una de Mbaiserael ve yem. Yehova maa tôô ican ne sha, Mbaigipiti mase koho asôhô a kpen tan atihi atihi. Tar la cii huma. Kpa, Farao shi venda u nan Mbaiserael gbenda ér ve yem.

Tsô Yehova kaa a Mose ér: ‘Aron a gbidye aga na la hen inya, nahan ihyundu la i hingir inyarev mbi nyuman.’ Fese nahan maa inyarev mbi nyuman lu hanma ijiir cii. Ior mba Farao mbagenev kaa a na ér: ‘Ican ne ka Aôndo a ve a mi ye.’ Nahan cii kpa, Farao lumun ér Mbaiserael ve yem ga.

‘Me na vea fa uwegh Agh kua tahav Av; man shi vea fa er iti Yam i lu Yehova je yô.’​—⁠Yeremia 16:⁠21