Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 12

Yakob Ngohol Dyako

Yakob Ngohol Dyako

Isaka yange lu anyom 40 shighe u vôso Rebeka la. Rebeka yange doo un ishima tsung. Shighe kar yô, ve mar ônov mba nomso uhar, ve lu ahina.

U vesen la iti na ér Isou, u kiriki la di iti na ér Yakob. Isou yange faan lun hen ya ga, shi lu ortato u fan ikyôr tsembelee. Kpa Yakob yô hemban lun hen ya.

Sha ayange la, yange ter nana kpe yô, inya man inyaregh ki nan undu la cii i hemba nan waniunda. I yilan kwagh ne ér dyako. Ken tsombor u Isaka yô, dyako wa uityendezwa mba Yehova er a Aberaham la kpa ker. Yange kwagh gba Isou sha uityendezwa mbara ga, kpa Yakob yô fa er ve lu a inja kpishi yô.

Iyange igen Isou yem ikyôr za shi ken toho zan zan va kur. Ijen kôr un kpishi. Tsô a ungwa ihyuma i kwaghyan u dedoo u Yakob lu jiidi yô, maa a kaa ér: ‘M ngu nôngon u kpen ijen! Nam kwaghyan la cuku m ya.’ Yakob kaa a na ér: ‘Me na u, kpa vande tôndon zwa a mo wer u nam dyako wou la.’ Isou gema kaa a na ér: ‘Kwagh gbam sha kwagh u dyako wam ga! A hingir u wou. Me yaan kwagh je beem.’ U nenge wer kwagh u Isou yange er la doo? Ei, doo ga. Isou yange gema kwagh u lun a inja tsung na sha an-gbande kwaghyan môm tseegh.

Yange Isaka va been iyol yô, shighe kuma u una na wan na u vesen la akaa a na a dedoo. Kpa Rebeka wase Yakob, wan na u kiriki la,  ngohol akaa a dedoo shon. Isou va fe nahan yô, ishima vihi un ker tsung, nahan a wa ishima u wuan anngô na u ve lu ahina la. Kpa Isaka man Rebeka soo ér ma kwagh a de eren Yakob ga, nahan ve kaa a Yakob ér: ‘Yem za lu vea Laban, anmgbian u mama wou u nomso la, zan zan ishimavihin i Isou la ia pever tsô u hide.’ Yakob ungwa kwaghwan u mbamaren nav, maa yevese ér una war uma na.

“Aluer or a zua a tar cii, man uma u nan una gema á saa nan yô, á doo nan sha nyi? Shin ka nyi kwagh man or nana na sha u paan uma u nan sha mini?”​—⁠Marku 8:​36, 37