Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 8

Aberaham man Sara Ungwa Imo i Aôndo

Aberaham man Sara Ungwa Imo i Aôndo

Geri ugen lu ikyua a ijiir i Babel la, i yilan geri shon ér Ur. Ior mba hen geri ne civir mbaaôndo mbagenev kpishi, ve civir Yehova ga. Kpa orgen lu hen geri u Ur la, u yange civir Yehova tseegh yô. Iti i or shon ér Aberaham.

Yehova kaa a Aberaham ér: ‘Undu ya wou kua ior ou, mough yem hen ijiir i me tese u yô.’ Maa Aôndo tôndo zwa a na ér: ‘U hingir ikyurior i vesen, shi ka sha ikyev you me na ior kpishi sha tar akaa a dedoo ye.’

Aberaham yange fa ape Yehova soo ér una yem jighilii ga, kpa a na Yehova jighjigh. Tsô Aberaham vea kwase na Sara, man ter na Tera, kua anngô na Loti, wa ikyav mough gba yemen gôgôzende, sha imo i Yehova.

 Shighe u ve za nyôr ken tar u Aôndo soo u tesen ve la, Aberaham lu anyom 75. I yilan tar la ér Kanaan. Aôndo maa tôndo zwa a Aberaham ken tar shon ér: ‘Tar u u lu her ne cii, me na ônov ou.’ Kpa Aberaham man Sara bee iyol shi ve mar ônov ga. Nahan a er nan man kwagh u Yehova ôr la una kure sha mi?

“Ka sha jighjigh u nan man Aberaham . . . wa ikyo a due a gba yemen hen ijiir i una va ya dyako sha mi la, a due kpa a fa ape a lu zan je ga.”​—⁠Mbaheberu 11:8