Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 11

I Kar Jighjigh u Nan u Aberaham

I Kar Jighjigh u Nan u Aberaham

Aberaham yange tese wan na Isaka kwagh u una wase un u yan ijende a Yehova yô, shi tese un u suur sha uityendezwa mba Yehova cii. Kpa zum u Isaka lu anyom 25 la, Yehova kaa a Aberaham ér a er kwagh ugen u hanma or je kpa a taver nan u eren yô. Lu nyi kwagha?

Aôndo kaa a Aberaham ér: ‘Tôô wan wou u nomso u môm môm la, za nam naagh a mi sha uwo ugen ken tar u Moria.’ Aberaham yange fa kwagh u na ve Yehova kaa ér a er nahan ga. Nahan cii kpa, Aberaham ungwa imo i Yehova.

Aberaham mough kpernan pepe pepe vea Isaka kua mbatomov nav mbagenev uhar ve gba yemen ken Moria. Ayange nga karen atar yô, ve ta ashe ve za nenge a uwo u Moria ken ica fiinii. Aberaham maa kaa a mbatomov nav mba uhar mbara ér ve tema ve keghen un, una za vea Isaka vea za na naagh. Aberaham na Isaka ikyon i nanden naagh a mi, Isaka tôô, Aberaham di tôô ihyô. Tsô Isaka pine ter na ér: ‘Waniyôngo u za nan naagh a mi ngu hana?’ Aberaham kaa a na ér: ‘Wan wam, Yehova una na waniyôngo.’

Mba za nyer hen uwo la yô, ve ta atse a nanden naagh sha mi. Aberaham maa kange Isaka ave kua angahar, kôr un penda sha atse la.

Aberaham tôôn ihyô yô, ortyom u Yehova ta ikyenge sha yila un kaa ér: ‘Aberaham! De eren wan wou ma kwagh ga! Hegen m fa u na Aôndo jighjigh sha ci u u kegh iyol u nan naagh sha wan wou u nomso je kpaa.’ Aberaham maa  nenge a zege nomiyôngo ugen wever akor ken ageva. Tsô Aberaham sagh Isaka ikyor kera fese, hide kôr iyôngo la na naagh a mi sha ityough ki Isaka.

Sha iyange la je Yehova kaa ér Aberaham ka ijende na. U fa ityôkyaa kpa? Aberaham yange eren hanma kwagh u Yehova a kaa ér a er cii, yange una fa er i hii ve Yehova a kaa ér a er kwagh shon ga je kpaa.

Yehova shi kimbir ôron Aberaham kwagh u yange tôndo zwa ér una er Aberaham la, ér: ‘Me ver u doo doo, shi me na ônov ou shin tsombor wou ua seer ngeen.’ Shi Yehova yange tôndo zwa ér una na ior mba dedoo mbagenev cii akaa a dedoo sha ikyev i tsombor u Aberaham.

“Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.”​—⁠Yohane 3:⁠16