Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 6

Iorov Anigheni Nyôr ken Tar u Mbaaferev Kera Lu Ga Yô

Iorov Anigheni Nyôr ken Tar u Mbaaferev Kera Lu Ga Yô

Noa yange nyôr ken tso la vea tsombor na kua annyamev. Yehova maa wuhe hunda u tso shon, maa ura hii u nôôn. Ura nôô zan zan tso va hii u kuan sha zar mnger. Shighe kar yô, tar iv a mngerem poo. Mbaaferev lu ken tso la ga, nahan ve cii ve kpe. Kpa Noa vea tsombor na yô, kwagh er ve ken tso ga. Er ve ungwa imo i Yehova nahan yô, u hen wer yange a saan ve iyol gaa?

Ura la lu nôôn tugh man atetan zan zan ayange 40 cii u mase tôndon ye. Mngerem uma kure kure. Maa tso la va hange sha uwo ugen. Kpa Noa vea tsombor na fatyô u duen ken tso hen shighe la ga, sha ci u mngerem lu sha tar deemee her.

Tegh tegh tsô, mngerem mara va uma kera. Noa yange tsa ken tso la vea tsombor na hemba inyom i môm. Yehova maa kaa a ve ér ve due ken tso la ve lu sha tar u mbaaferev kera lu ga la. Yange doo ve kpishi er Yehova a war ve yô, nahan ve na Yehova naagh sha kwagh u dedoo u a er a ve la.

Naagh ku ve na la doo Yehova. Nahan a tôndo zwa a ve ér una kera tim hanma kwagh shin tar sha mngerem ma deemee ga. Tsô a er ikyume i due sha kwavaôndo sha kwa hiihii, ér i lu ikyav i ityendezwa na ne. I gbe nahan u nenge a ikyume vee?

Yehova maa kaa a Noa vea tsombor na ér ve mar ônov ve iv tar.

“Noa kar nyôr ken tso la, kpa [ior] fa ga zan zan mngerem ma deemee va, va kuwa a ve cii.” ​—⁠Mateu 24:​38, 39