Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 4

Ishima Vihi Un Gbem A Wua Or

Ishima Vihi Un Gbem A Wua Or

Adam man Ifa yange mba duen ken sule u Eden kera yô, ve mar ônov kpishi. Kain u lu wan ve u hiihii la lu orsule. Abel wan ve u sha uhar la di lu orkuranilev.

Iyange igen yô, Kain man Abel na Yehova naagh. U fa kwagh u a lu naagh kpa? Ka u nan or iyua. Naagh ku Abel yange ku doo Yehova ishima, kpa nagh ku Kain yô, a venda. Kwagh ne na yô, ishima vihi Kain kpishi. Yehova yange ta Kain icin ér a wa ikyo, ga yô ishimavihin na la ia na una er kwaghbo. Kpa Kain ungwa ga.

Tsô Kain kaa a Abel ér: ‘Va se za ken toho yôô.’ Shighe u ve lu ken toho ve uhar tseegh la, Kain ta num sha anngô na, maa wua un je. Yehova una er nyi sha kwagh ne? Yange Yehova  tsaha Kain, zenda un, kera lu ikyua a tsombor na ga. Lu u mayange je a kera na Kain ian ér a hide ga.

Ka nyi se fatyô u henen ken kwagh ne? Zum u akaa a lu zan er se soo la ga yô, alaghga ishima ia hii u vihin se ker. Kpa aluer se fa ser ishima doo se ker ga, shin mbagenev mba wan se kwagh sha ci u ve nenge ishima doo se ker ga yô, doo u se sôr ishima yase fese shi se kighir ishimavihin la, gayô ia na se er kwaghbo.

Er Yehova doo Abel ishima sha mimi shi Abel er kwagh u vough yô, Yehova una hungur kwagh na mayange ga. Shighe u Aôndo una gema tar ua hingir paradiso la, una nder Abel shin ku, nahan Abel una hide a lu uma.

‘Za vande himen iyongo a anngôu, man ú hide, ú va na iyua you ye.’ ​—⁠Mateu 5:⁠24