Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 3

Adam man Ifa Hemba Aôndo Ato

Adam man Ifa Hemba Aôndo Ato

Iyange igen iyô va lam a Ifa shighe u lu vea nom na ga yô. Iyô la pine Ifa ér: ‘Mimi je Aôndo na ne ian i yan atam a ikyon i ken sule ne cii gaa?’ Ifa gema kaa ér: ‘Dugh kon môm sha yô, se fatyô u yan atam a ikyon igen ne cii. Kpa aluer se ya atam a kon shon la yô, se kpe.’ Iyô la kaa ér: ‘Ne kpe ga. Kpa aluer ne ya kon la yô, ne hingir er Aôndo nahan.’ Kwagh u iyô ôr ne lu mimii? Ei, lu aie. Kpa Ifa na jighjigh a mi. Er lu kenger atam a kon la yô, a lu hemban saren un cii. Tsô a ya ityamegh ki kon shon, shi a na nom na kpa ya. Adam yange fa dedoo je ér aluer ve hemba Aôndo ato yô, vea kpe. Nahan cii kpa, Adam ya ityamegh ki kon shon.

Sha iyange la aikighe, Yehova lam a Adam man Ifa. A pine ve er i hii ve ve hembe un ato yô. Ifa gema ibo na iyô, Adam di gema ibo na Ifa. Kpa er Adam man Ifa hemba Yehova ato yô, Yehova zenda ve ken sule u Eden kera. Yehova maa ver mbatyomov kua sanker u jingir sha gbenda u karen nyôron ken sule shon la, sha u ve de kera faantyô u hiden nyôron ker ga yô.

Tsô Yehova kaa ér or u nan tsugh Ifa la kpa nana war ga. Lu iyô la kpôô kpôô i lam a Ifa ga. Yehova yange gba iyô ér i lamen ga. Ka ortyom ugen u a hendan a Aôndo yô, yange nyôr ken iyô lu lamen ye. Yange er nahan ér una bume Ifa. Iti i ortyom shon ér Satan Diabolo. Ken hemen yô, Yehova una tim Satan kera sha er una kera fatyô u bumen ior ér ve er akaabo ga yô.

“Diabolo . . . lu orwuanor sha hiihii je, man a tile sha mimi ga sha ci u mimi ngu ker a na ga.”​—⁠Yohane 8:⁠44