Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 98

Kwaghaôndo u Mbakristu Samber sha Tar Wuee

Kwaghaôndo u Mbakristu Samber sha Tar Wuee

Yange Mbaapostoli dondo kwagh u Yesu ôr a ve ér ve samber a loho u dedoo i tser tar la. Ken inyom i 47 la, anmgbianev mba ken Antioki tindi Paulu vea Barnaba ér ve za pase kwagh ken ityar igen. Iorov mbauhar mba tseen ishima mban zende sha ajiir a hen tiôntar u Ashia u Kiriki la cii, er Derebe, Lisetera, man Ikonium nahan.

Paulu man Barnaba lu pasen hanma or cii kwagh, mbanyarev man mbaatsanev, mbayev man mbabeenyol kpaa. Ior kpishi lumun mimi u i lu pasen ve sha kwagh u Kristu la. Shighe ugen la Paulu man Barnaba lu pasen gomna u hen Shiperu kwagh, iti na ér Sergiu Paulu, maa or u eren ahir ugen lu nôngon ér una yange ve. Tsô ve kaa a or u eren ahir la ér: ‘Yehova una tsaha u sha kwagh u u lu eren ne.’ Her ave ave je maa or u eren ahir la pir ashe. Gomna Sergiu Paulu nengen nahan yô, a hingir or u nan jighjigh.

Paulu man Barnaba yange ve pase kwagh hanma ijiir cii, sha uya uya man sha igbenda man ken ukasua kua ken ushinagoge kpaa. Yange ve bee oriwan ugen iwan ken Lisetera, maa mba ve nenge ivande ne la hen ér ka mbaaôndo, nahan ve gba nôngon ér vea civir ve. Kpa Paulu man Barnaba venda a ve kaa ér: ‘Civir nen Aôndo tseegh! Se mba di ior tsô.’ Tsô Mbayuda mbagenev va na ikpelaior la mough ayôôso a Paulu. Ikpelaior la ta un awen, kpela un za kende ken won gar, ér a kpe. Nahan kpa, Paulu kpe ga! Fese je anmgbianev va wase un, kua a na hide nyôr a na ken gar. Kpernan maa Paulu mough hide ken Antioki.

Ken inyom i 49 la, Paulu shi yem zende ugen u za pasen kwagh. Shi za kar za ken Ashia u Kiriki ér una nenge anmgbianev mba ker, shi za mough ker yem ica, ken veghertar u Yuropa la, u za pasen loho u dedoo ker.  A za ken Filipi man Tesalonika man Atene, kua ajiir agen kpaa. Shila man Luka kpa za zende ne vea Paulu, kua gumor ugen, i yilan un ér Timoteu. Yange ve er tom u veren iniongo i Kristu shi taver anmgbianev mba ken iniongo shon asema. Paulu yange tsa ken gar u Korinte je kuma inyom i môm man iwer ataratar, lu taver anmgbianev mbara asema. A pase kwagh her shi a tese ior shi a nger uwashika hen iniongo i Kristu kpishi. Shi Paulu yange eren tenti zuan a inyaregh ki nengen sha iyol na. Shighe kar yô, Paulu mough heela yem ken Efese, za mough hide ken Antioki.

Paulu shi va mough ken inyom i 52 la yem zende na u za pasen kwagh u sha kwa tar, a hii hen Ashia u Kiriki. Za mough heela zende gôgônan yem ken Filipi, shi za kar yem ken Korinte. Paulu kar za tsa ken Efese anyom imôngo, lu tesen ior, been ior iangev shi wasen nongo u Kristu u u lu her la. Shi lu nan akaaôron ken igbar hanma iyange ken ijiir i makeranta. Ior kpishi ungwa gema uuma vev. Paulu yange pasen loho u dedoo sha ajiir wue wue been yô, a mase hiden ken Yerusalem.

“Nahan yô, za nen, za gema nen akuraior cii a̱ hingir mbahenen.”—Mateu 28:19