Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 89

Peteru Tuna Ér Un Fa Yesu Ga

Peteru Tuna Ér Un Fa Yesu Ga

Shighe u Yesu lu vea mbaapostoli nav ken iyou i sha aôndo, i ve tema kwaghyan ker la, a kaa a ve ér: ‘Ne cii ne va yevese ne undum hen tugh mbun.’ Kpa Peteru kaa a na ér: ‘Mo yô ga! Aluer mbagenev cii vea undu u kpa, mo yô, mayange je me undu u ga.’ Yesu gema kaa a Peteru ér: ‘Ikyegh i sha use ia lu a tôngo ga je tsô, u tuna kwa tar wer u fam ga.’

Shighe u ushoja va kôr Yesu lu yemen a na hen ya u Kayafa la, mbaapostoli mbagenev kpishi yevese undu un. Kpa mbaapostoli mbagen uhar dondo ikpelaior la ijime. Apostoli u môm lu Peteru. Yange za nyôr ken ya u Kayafa, tema ken tembeya lu ôson usu. Er iwanger i usu la ta sha Peteru yô, wankwase ugen u eren tom hen ya u pristi nenge a na maa fa, maa a kaa ér: ‘M fa u! We kpa ka u lu vea Yesu!’

Peteru kaa a wankwase la ér: ‘Ei, m lun vea na ga! M fa kwagh u u lu ôron la ga!’ Peteru maa kar gba yemen sha hunda u ya la, ér una due ken won. Kpa lu a due ga je tsô, wankwase ugen kposo shi nenge a na, maa ôr ikpelaior ér: ‘Or ne kpa ka a lu vea Yesu!’ Peteru kaa ér: ‘M fa or u i yilan ér Yesu la tsô kpaa ga!’ Orgen gema kaa ér: ‘U ngu môm ken mba ka ve lu vea na la! M fa u sha iliam you. U ngu or u ken Galilia, er Yesu nahan.’ Kpa Peteru tuna je bum, kaa ér: ‘M fa un ga!’

Hen shighe la je maa ikyegh i sha use tôngo. Peteru maa nenge Yesu gema ashe kenger un. Tsô a umbur kwagh u Yesu vande ôron a na la, maa a due ken won a gba za vaan tsung.

Shighe ne nahan yô, Mkohol u mbaajiriv cii tema ken ya u Kayafa lu keghen u ôron Yesu ijiir. Ve vande wan ken ishima ér vea wua Yesu, nahan ve lu masen keren kwagh u vea kôr ave sha mi, vea wua un yô. Kpa ve zua un a ibo sha kwagh môm tsô kpaa ga. Ken masejime yô, Kayafa kende pine Yesu jighilii ér: ‘U ngu Wan u Aôndo?’ Yesu kaa ér: ‘Een, m ngu.’ Kayafa maa kaa ér: ‘Kuma nahan. Se kera pine ma orgen kwagh ga. Ne ungwa er a tuhwa Aôndo ve ga!’ Mbaajiriv mbara cii  lumun zwa môm ér: ‘I wua or ne keng keng.’ Tsô ve gba tan Yesu sambe, shi tan un azer iyol, shi ve kange un ishigh, ve lu tan un azu, kaan ér: ‘Wea lu profeti yô, ôr se or u nan te u iju la!’

Sev mbu aven yô, ve yem a Yesu hen ate u Mkohol u Mbaajiriv ôron ajir her la, ve za kimbir pinen un ér: “U ngu Wan u Aôndo?” Yesu kaa a ve ér: ‘Kape i lu vough je la.’ Maa ve na un ibo ér a tuhwa Aôndo. Tsô ve yem a na hen ya u Pontiu Pilatu, Orromanu u lu gomna la. Nahan lu nyi i za ere? De se nenge.

“Shighe ngu van, a ar je ve u á sambe ne, hanma or nana yem kwagh u nan, né mase undun Mo tswen; nahan kpaa M ngu tswen ga, gadia Ter ngu vea Mo.”—Yohane 16:32