Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 84

Yesu Zende sha Zarmnger

Yesu Zende sha Zarmnger

Yesu yange bee ior iangev shi nder mbakpenev shin ku tseegh ga. Kwagen la zegeura lu nôôn shi ahumbe lu eren taveraa, maa Yesu kaa ér uraahumbe la u de, maa u de je. Shi kwagen la Yesu za er msen sha uwo been yô, a gema a nenge zegeahumbe lu kpianger a Zegemnger u Galilia la je doo ga. Mbaapostoli nav gema lu shin tso, ken atô u zegemnger la. Ve lu fantyô u zan ken hemen ga, sha ci u ahumbe la lu van ve sha hemen. Yesu maa hungwa sha uwo, gba zenden sha zarmnger, zan vegher u tso lu yemen la. Mbaapostoli mba nengen or ngur zenden sha mnger karen yô, cier ve iyol kpishi. Kpa Yesu kaa a ve ér: ‘Ka mo. De cian nen ga.’

Peteru kende kaa ér: ‘Tere, a lu we mimi yô, kaam m va kohol we.’ Yesu kaa a Peteru ér: ‘Va ase.’ Peteru maa hungwa shin mnger ken ahumbe a taver la, gba zenden sha zarmnger zan, una za kohol Yesu. Kpa Peteru za zurum a Yesu yô, a nenge, ahumbe la taver tsung. Nahan cier un iyol, maa a hii u miren shin mnger. Tsô a genger imo a kaa ér: ‘Tere, yimam!’ Yesu maa za fese gba Peteru sha uwe, hide pine un ér: ‘Er nan ve u va hii u tan akpelana? U kera ngu a jighjigh u nan gaa?’

Tsô Yesu man Peteru nyôr shin tso, maa fese je zegeuraahumbe la de. U hen wer yange a lu mbaapostoli mbara ken ishima nena? Yange ve kaa ér: “Mimi je U ngu Wan u Aôndo.”

Lu kwa ne tseegh Yesu yange zegeuraahumbe ga. Kwagen la kpa Yesu nyôr tso vea mbaapostoli nav, ve lu peren zegemnger. Nahan Yesu za yav shin ityôtsoogh, gba mnyam. Tsô zegeuraahumbe za va. Mngerem lu kpianger tan sha tso sha agee, karen haan shimi. Mngerem haa shin tso poo. Tsô mbaapostoli za nder Yesu, ve kaa a na ér: ‘Kpei, Ortesen! U wase se ga yô, se tim hegen hegen je!’ Yesu maa mough kaa a zegemnger la ér: “Huan, lu ving!” Yange ahumbe la de her ave ave je, zegemnger maa huan ving. Yesu hide pine mbaapostoli nav ér: ‘Ne mba a lu a jighjigh u nan gaa?’ Tsô ve gba ôron ayol a ve ér: ‘Ahumbe man zegemnger je kpa mba ungwan imo na.’ Mbaapostoli mbara maa hen kwagh ken kwagh ne, ér, aluer ve na Yesu jighjigh je ve de u tan akperan yô, kwagh a kera cier ve iyol ga.

“M na jighjigh mer me nenge mdoom ma [Yehova] ken tar u mbaumav.”—Pasalmi 27:13