Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 83

Yesu Na Ior Udubu Imôngo Kwaghyan

Yesu Na Ior Udubu Imôngo Kwaghyan

Shighe u zurum u a er iniongo i Paseka i ken inyom i 32 la, mbaapostoli za hide zende u ve due u pasen kwagh la. Yange ve vôr, nahan Yesu mough a ve, ve nyôr tso ve per Zegemnger u Galilia, ve yem ken Betesaida ér vea za mem. Kpa tso za zurum a kpetar yô, Yesu nenge ior udubu imôngo dondo ve ijime lu van. Shin er Yesu soo u lun vea mbaapostoli nav tseegh nahan kpa, a lumun ér ior mbara ve va hen a na, shi a er a ve doo doo. Yange bee mba ve lu dedoo ga la iangev vev, maa a hii u tesen ve kwagh. Yesu tôô shighe kpishi tese ve kwagh u Tartor u Aôndo sha iyange la. Ka va hingir aikighe yô, mbaapostoli nav va hen a na va kaa a na ér: ‘Ijen kôr ior mban. Na ve gbenda ve yem ve za ker kwagh ve ya.’

Yesu gema kaa a ve ér: ‘Saa vea yem ga. Na nen ve kwaghyan heen.’ Mbaapostoli kaa a Yesu ér: ‘U soo wer se̱ za yam ve kwaghyana?’ Apostoli u môm, iti na ér Filibu, kaa a Yesu ér: ‘Inyaregh yasegh kia ngee nan nan kpa, se yam kwaghyan a mi una kuma u nan ikpelaior ne ga.’

Yesu pine ve ér: ‘Ne mba a kwaghyan kuma nena?’ Anderia kaa ér: ‘Se mba a ikpenbredi itian, man anishuuv uhar. Kwaghyan la kuma cuku tsô kpaa ga.’ Yesu kaa a ve ér: ‘Vam nen a ikpenbredi la man anishuuv mbara.’ Yesu maa kaa ér i ôr ior mbara ve tema sha toho hen ijiir la iorov akunduahargber akunduahargber, man iorov deri deri. Mba tem cii yô, Yesu tôô ikpenbredi la man anishuuv mbara, kende ashe sha, maa er msen. Been yô, a gema a na mbaapostoli, ve di ve kar ior mbara. Ior mbara yange ve ngee je kuma iorov 5,000, lu nomso man kasev  kua mbayev cii. Yange ve ya kwaghyan la kuma ve gbing gbing. Mba moughon kera yô, mbaapostoli kohol kwaghyan u neer her la ér kwaghmôm a de saan ishe ga. Kwaghyan u neer la iv akese pue kar ahar poo poo! Kwagh ne lu ivande i kpilighyol, shin i kpiligh iyol ga?

Yange doo ior mbara je ve soo ér vea na Yesu tor. Kpa Yesu fa ér shighe u Yehova a ver ér una va lu tor la, ngu a kuma ga. Tsô a na ior mbara gbenda ve yem, maa a kaa a mbaapostoli nav ér ve mough ve hide ve per Zegemnger u Galilia yande la. Mbaapostoli mba nyôron shin tso yô, Yesu kar unde sha uwo un tswen. Una za er nyi? Yange lu keren ian i eren msen hen Ter na. Yesu yange una lu a tom kpishi kpa, hanma shighe yô, a ker ian a er msen.

“De kera eren nen tom sha ci u kwaghyan u a saan ishe ga, kpa i̱ lu sha ci u kwaghyan u a lu zan zan uma u tsôron, u Wan u or Una na ne yô.”—Yohane 6:27