Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 80

Yesu Tsua Mbaapostoli Puekaruhar

Yesu Tsua Mbaapostoli Puekaruhar

Yesu yange pase kwagh kuma inyom i môm man tiôn nahan, maa gba u una er kwagh ugen u hange hange. Ka unô una tsua ve, vea eren tom a na imôngôô? Man ka unô una tese ve u hemen nongo u Kristu, shin Mbakristu? Yesu yange soo ér Yehova a tese un er una er akaa ne yô. Nahan iyange igen yô, a due a yem sha uwo ugen tugh, hen ijiir i or lu her ikyua ga yô, a za er msen zan zan sev av. Sev mbu wanger yô, a yila mbahenen nav va kohol, maa a tsua mbaapostoli 12 ken a ve. Ka unô ken a ve u umbur ati a ve? Ve yô, lu Peteru, Anderia, Yakobu, Yohane, Filibu, Bartolomeu, Toma, Mateu, Yakobu wan u Alefeu, Tadeu, Shimon man Yuda u Isekarioti

Anderia, Peteru, Filibu, Yakobu

Iorov mba Puekaruhar mban yange ve zenden vea Yesu imôngo. Yesu yange tese ve tom u pasen kwagh la been yô, a tindi ve tseegh ve za pase kwagh. Yehova yange na ve tahav mbu dughun ujijingi mba bov shi been ior iangev.

Yohane, Mateu, Bartolomeu, Toma

Yesu yange yila mba Puekaruhar mbara ér azende a na, shi yange na ve jighjigh. Mbafarishi yange ve nengen mbaapostoli ér  ve fa takerada ga shi mba kwagh ga. Kpa Yesu tese mbaapostoli nav u eren tom ve. Yange ve lu vea Yesu sha ashighe a hange hange ken uma na, er shighe u zurum u a wua un la nahan, kua shighe u i nder un shin ku kera la. Mbagenev kpishi ken mba Puekaruhar mbara lu ior mba ken Galilia, di er Yesu nahan. Mbagenev ken a ve er kasev.

Yakobu wan u Alefeu, Yuda u Isekarioti, Tadeu, Shimon

Mbaapostoli kpa lu ken mlu u isholibo er se nahan. Ashighe agen yange ve er kwagh sha inja ga. Shighe ugen ve hen sha kwagh tsembelee ga tsô maa ve ôr je, shin ve er kwagh ugen dang. Ashighe agen ve ngôôr yinan ishima ga. Yange ve gba ayôôso sha kwagh u or u nana lu orvesen ken a ve je kpaa. Kpa ve lu ior mba fan kwagh, mba Yehova doo ve ishima yô. Lu ve je nongo u Kristu hii sha a ve, shighe u Yesu hide yem sha la ye.

“M yila ne Mer, [azende], gadia akaa a M ongo hen Terem cii, M ôr ne a.”​—⁠Yohane 15:⁠15