Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 VEGHER 77

Yesu Lam a Kwase hen Kpe Ijôr

Yesu Lam a Kwase hen Kpe Ijôr

Yange mba eren iniongo i Paseka i ken inyom i 30 la mba been shighe karen yô, Yesu hide lu yemen ken Galilia vea mbahenen nav, nahan ve kar gbenda ken Samaria. Mba za zurum a geri u Shikar yô, Yesu soo u memen hen ijiir igen, i yilan ijiir la iti ér, ijôr i Yakob. Yesu nguren memen her yô, mbahenen nav kar nyôr ken geri la ér vea za yam kwaghyan.

Tsô kwase ugen za va hen ijôr shon, u va kesen mngerem. Yesu maa kaa a na ér: ‘Wea lumun yô, nam mngerem m ma yôô.’ Kpiligh kwase la iyol, a kaa a Yesu ér: ‘U ngu ôron kwagh a mo wer nyi? Mo m ngu kwase Samaria. Mbayuda mba lamen a Mbasamaria ga.’ Yesu kaa a na ér: ‘Wea fem yô, ma u sônom mngerem, nahan ma m ne u mngerem ma ma lu uma yô.’ Kwase la pine Yesu ér: ‘Ka nyi u ôron mo laa? Ikyagh ki kesen mngerem tsô kpa u ngu a mi ga.’ Yesu kaa ér: ‘Hanma or u nana ma mngerem ma me na nan cii yô, imura ia kera kôr nan mayange ga.’ Kwase la kaa ér: ‘Orvesen, yô nam ase mngerem ou mara.’

Tsô Yesu kaa a kwase la ér: ‘Za va a nomou hen ijôr heen.’ Kwase la kaa ér: ‘M ngu a nom ga.’ Yesu kaa a na ér: ‘Ka mimi. U vande vôson noov utaan, shi hegen kpa or u u lu vea na la ka nomou ga.’ Kwase la maa kaa ér: ‘M nenge mer u ngu profeti. Ior av na jighjigh ér se fatyô u civir Aôndo sha uwo ne, kpa Mbayuda ka ve kaan ér ka ken Yerusalem tseegh se fatyô u civir Aôndo ye. M na jighjigh mer Mesiya una va yô, una tese se er se civir Aôndo yô.’ Yesu maa ôr kwase ne kwagh u vande ôron or môm môm ga yô, a kaa ér: ‘Ka mo m lu Mesiya shon ye.’

 Kwase la maa kar ayem, nyôr ken gar, gba za ôron Mbasamaria ér: ‘Orgen fa hanma kwagh wam. Kam er ka Mesiya nahan. Va nenge nen!’ Kwase la yange za cin hide hen ijôr la vea ior kpishi, ve va ungwa ityesen i Yesu.

Tsô Mbasamaria kaa a Yesu ér a lu hen geri ve. Yesu maa lu a ve her, a tese ve kwagh ayange ahar, nahan ior kpishi na un jighjigh. Ve kaa a kwase u ken Samaria la ér: ‘Akaa a or ne a ôr se ne cii tese ér mimi je, ka un a lu oryiman tar ye.’

“Va! Or u imura i ker nan yô, nana̱ va. Or u i sar nan kpaa, nana̱ va, nana̱ va ngohol mngerem ma umam gbilin.”—Mpase 22:17