Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 67

Ukpekpe mba Gilgar u Yerusalem

Ukpekpe mba Gilgar u Yerusalem

De se nenge kwagh u yange er anyom a karen ken ijime kpuaa cii man i maa ukpekpe mba gilgar i bee la. Nehemia, Oriserael u hen geri u Shushan, ken tar u Pershia, yange lu ortom u Tor Artashaseta. Tsô anmgbian u Nehemia u nomso mough ken tar u Yuda va ôr Nehemia loho u vihin tsung, a kaa ér: ‘Kwagh a va tser ior mba ve hide ve yem ken Yerusalem la. Sha ci u mba a hide i maa ukpekpe mba gilgar sha ajiir a Mbababilon yange ve yôhôr la ga, shi ihinda i yange i hia la kpa mba a hide i wa her ga.’ Yange ishima za Nehemia iyol tsung. Nahan a soo u zan ken Yerusalem za nan iwasen. Tsô a er msen ér Yehova a wase, tor a na un ian una za.

Shighe karen yô, tor nenge Nehemia saan ga. Tsô tor kaa ér: ‘I gbe je u ngu a yue nahan ga. Ka nyi i er u we?’ Nehemia kaa a na ér: ‘Yerusalem, geri wam la yôhôr hingir alôgh, nahan a er nan ve me yue ga?’ Tor hide pine un ér: ‘Ka nyi u soo wer m er sha ci wou we?’ Nehemia hide fese er msen shin ishima, maa kende kaa a tor ér: ‘Wea lumun yô, nam ian m za ken Yerusalem, m za hide m maa ukpekpe mba gar la her.’ Tsô Tor Artashaseta na Nehemia ian ér a za, shi tor er hanma kwagh cii sha u kuran Nehemia sha gôgô gbenda la. Shi yange ver Nehemia lu gomna u tar u Yuda, shi na un ikyon i eren ihinda i gar la a mi.

Nehemia za nyer ken Yerusalem yô, a zende a nenge gilgar cii. Tsô a yila upristi man utyombaiorov zua, a kaa a ve ér: ‘Kwagh ne kunda iyol. Se hii nen tom.’ Ior cii lumun. Tsô ve hii u maan ukpekpe mba gilgar shon sha ajiir a yange yôhôr la.

Kpa mbaihyomov mba Mbaiserael lu sen ve kaan ér: ‘Icôngo i môm tseegh kpa ia unde sha gil u ne maan ne, ia yôhôr un.’ Kpa kwagh gba mbatomov mbara sha iliam ve la ga, ve lu maan gilgar ve her. Nahan ukpekpe mba gilgar la lu taven, shi lu taver seer a seer.

Tsô mbaihyomov mbara za wa kwagh ér vea va avegher cii, vea va due kwa môm, vea ta num sha Yerusalem abur abur. Er Mbayuda ungwa kwagh u ve soo u eren ne yô, cier ve iyol tsung. Kpa Nehemia kaa a ve ér: ‘De cian nen ga. Yehova ngu a vese.’ Tsô a ver mbakuran ér ve kuran mbatomov, nahan mbaihyomov mbara kera fatyô u va tan num sha a ve ga.

 Ken ayange 52 tseegh, i bee tom u maan ukpekpe mba gilgar la, shi i wa ihinda cica. Tsô Nehemia lôhô Mbalevi cii va kohol ken Yerusalem sha u tseghan gar. A ver mbawan atsam lu iniongo ihiar. Iniongo ne unde sha gilgar hen ijiir i unden, i hen Hundagar u Imbor i Mnger la. Nahan nongo u môm lu zan sha gilgar vegher u ken iyan. Nongo ugen la di lu zan vegher u ken imese, sha u ningir gar la. Ve lu wan atsam wuese Yehova, tôngon ikyor shi kuhwan mbaadiguve man myôm ma kuan a kua. Esera lu zan vea nongo u môm, Nehemia di lu zan vea nongo ugen la, zan zan ve za zua hen tempel. Tsô ior cii, nomso man kasev kua mbayev kpaa, na Yehova iniav vev, shi ve ember. Er ve lu wan atsam saan saan yô, akenge a ve hura yem ica.

“Hanma ityumugh ki i var sha ci u vihin we iyol, ikyôr ia lagh ki ga.”​—⁠Yesaia 54:⁠17