Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 59

Mbayevnomso Unyiin Mba Ve Ungwa Imo i Yehova Yô

Mbayevnomso Unyiin Mba Ve Ungwa Imo i Yehova Yô

Nebukadinesar yange kura utyombaiorov mba ken tar u Yuda yem a ve ken Babilon, za wa ve sha ikyev i orgen u eren tom hen ya u tor, iti na ér Ashipenashi. Nebukadinesar maa kaa a Ashipenashi ér a sange mbayevnomso mbagenev mba ve hembe lun gbong gbong shi ve hembe lun tsev tsev yô, ken icombor i utyombaiorov mbara. Lu u a tese mbayevnomso mba shon kwagh anyom atar. Nahan ityesen la ia wase ve u eren ityom i vesen ken tar u Babilon. Yange gba u mbayevnomso mbara vea hen u ôron takerada shi ngeren kwagh shi lamen ken zwa Akkadia, u i lamen ken Babilon la. Shi gba u vea yaan kwaghyan u tor kua ior mba hen ya na cii yaan la. Mbayevnomso unyiin ken mbayev mbara yô, lu Daniel man Hanania man Mishael kua Asaria. Ashipenashi yange na ve ati a he, a  ken zwa u ior i Babilon. Yange ii Daniel iti ér Beleteshasar, man Hanania ér Shaderaki, man Mishael ér Meshaki, man Asaria ér Abedi-nego. Lu u ityesen ne ia na vea de u civir Yehova?

Mbayevnomso mba unyiin mbara yange ve kange ishima ér vea za hemen u ungwan imo i Yehova. Yange ve fa ér gba u vea ya kwaghyan u tor la ga, sha ci u tindi u Yehova tese ér akaayan shon agen nga wang ga. Nahan ve kaa a Ashipenashi ér: ‘Wea lumun yô, de ne se kwaghyan u tor ga.’ Ashipenashi gema kaa a ve ér: ‘Aluer ne venda u yan kwagh, man tor va nenge ne kande er ne gba angev nahan yô, una wuam!’

Daniel maa due a mhen. A kaa a wanye u Ashipenashi, u Ashipenashi ver un ér a nengen sha a ve la ér: ‘Wea lumun yô, naan se ikyayue kua mngerem tseegh zan zan ayange pue. Nahan nenge mlu wase man mlu u mbayevnomso mba ve lu yan kwaghyan u tor la.’ Or la maa lumun.

Ayange pue nga been yô, Daniel man azende a na a atar la hemba lun iyol gbur gbur a mbayevnomso mbagenev mbara cii. Yange doo Yehova kpishi er ve ungwa imo na yô. Nahan Yehova na Daniel iyua i pasen mnyam kua akaa a ken hemen je kpaa.

Yange mba tesen mbayevnomso mbara mba been yô, Ashipenashi va a ve cii hen Tor Nebukadinesar. Tor lam a ve, maa nenge ér Daniel man Hanania man Mishael man Asaria hemba mban a kwaghfan shi hemba mban tsev tsev a mbagenev mbara cii. Maa tor tsua ve mba unyiin mban ér ve eren tom ken ya na. Yange tor una soo u eren mhen sha ikyaa i vesen yô, a yila ve ve va na un mhen. Yehova yange na ve kwaghfan, nahan ve lu a kwaghfan hemba mbafankwagh kua mbaeren ahir mba tor lu a ve cii.

Shin er Daniel man Hanania man Mishael man Asaria lu ken tar ugen ica nahan kpa, yange ve za hemen u umbur ér ve mba ior mba Yehova. Aluer u ngu vea mbamaren ou ga nahan, we kpa u za hemen u umbur Yehova hanma shighe cii kpa?

“Ma or nana̱ de lahan we er u ngu wanye ga, kpa hingir mbananjighjigh ikyav sha kwaghôron man sha zende man sha dooshima man sha jighjigh u nan man mlu u wang kpaa.”​—⁠1 Timoteu 4:⁠12