Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 60

Tartor u Lun Gbem sha Won

Tartor u Lun Gbem sha Won

Tor Nebukadinesar yange yav tugh mbu gen mnyam cier un, kpa fa inja i mnyam ma shon ga. Nahan ishima za un iyol je kera fatyô u yaven ga. Tsô a yila ior nav mba eren ahir va her a na, a kaa a ve ér: ‘Pasem nen inja i mnyam man.’ Ve kaa a na ér: ‘Yô ôr se mnyam ou, Tor.’ Kpa Nebukadinesar kaa a ve ér: ‘Ei! Ne ôrom nen, ga yô me wua ne.’ Shi ve kaa a na ér: ‘Ôr se mnyam ma ma cier we la, tsô se pase u inja i ma.’ A kaa a ve ér: ‘Ne cii ne soo u bumen mo. Ôrom nen!’ Ve kaa a tor ér: ‘Orumace môm kpa nana fatyô ga. Kwagh a fatyô u eren nahan ga.’

Yange ishima nyoon Nebukadinesar je a na zwa ér i wua mbafankwagh mba ken tar na cica cii, kua Daniel, Saderaki, Meshaki man Abedi-nego kpaa. Kpa Daniel kaa a tor ér a na un shighe kpuaa. Maa Daniel vea azende a na er msen hen Yehova, ve zamber a na ér a wase ve. Nahan Yehova er nena?

Yehova yange wase Daniel nenge a mnyam ma ma cier Nebukadinesar la ken jijingi, shi Yehova pase un inja i ma kpaa. Kpernan maa Daniel za hen ortom u tor, za kaa a na ér: ‘De wuan orfankwagh môm môm ga. Me fatyô u pasen mnyam ma tor mara.’ Ortom la maa za a Daniel hen Nebukadinesar. Daniel za kaa a tor ér: ‘Aôndo pase u kwagh u una va er ken hemen yô. Kape mnyam ma cier we je ne: U nenge a eev mbu kehen, i er ityough ki eev mbura sha zenaria, vanger man ave a mbu lu sha azurfa, iyav man anam a mbu lu sha togula, angahar a mbu lu sha iyôgh, ikpande angahar yô, gema lu inyatyuu nungwa iyôgh. Tsô iwen za bugh sha uwo ugen va ta sha ikpande angahar i eev mbura. Nahan eev mbu shon hembe avur avur, maa ahumbe purugh a mi kera. Iwen la maa hingir zege uwo, kehe iv tar.’

Tsô Daniel kaa a tor ér: ‘Ka inja i mnyam ou man je ne: Ityough ki zenaria kira ka tartor wou. Azurfa la tile sha ityough ki tartor ugen u ua kar a  hemen tar cii, zum u u kpe kera yô. U ngura kpa ua va karen kera yô, tartor ugen u taver er togula nahan, ua kar a hemen tar cii. U kpa ua va karen kera yô, tartor ugen u taver er iyôgh nahan ua va. U ngun kpa ua va karen kera yô maa tartor u masetyô ua va. U masetyô ne ua lu a avegher agen ker a taver er iyôgh nahan, man avegher a taver ga er inyatyuu nahan. Iwen i i hingir zegewo la ka Tartor u Aôndo. Ua hembe ityartor igen ne cii avur avur, kpa u yô, ua lu gbem sha won.’

Nebukadinesar ungwan nahan yô, a gure a suur ityough inya, sha ishigh ki Daniel. A kaa a Daniel ér: ‘Mimi je, Aôndo wou pase u mnyam man. Aôndo ugen u lun er un nahan ngu ga.’ Maa Nebukadinesar kera wua Daniel ga, kpa ver un tor sha tiôntar u Babilon cii, man shi orhemen u vesen u mbafankwagh mba Babilon cii. U nenge gbenda u Yehova yange ungwa msen u Daniel ne kpa?

“Ve kohol ve imôngo hen ijiir i i yer ken zwa u Heberu er Armagedon la.”​—⁠Mpase 16:⁠16