Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hen Akaainjaa ken Bibilo

 VEGHER 58

I Tim Yerusalem

I Tim Yerusalem

Ior mba ken tar u Yuda yange ve zer undun Yehova za civir mbaaôndo mbaaiev. Kpa Yehova za hemen u wasen ve anyom kpishi. Yange tindi uprofeti imôngo ér ve ta ve icin, kpa ve soo u ungwan ga. Ve er a uprofeti mbara dang. Yehova yange bee a ieren ve i civir akombo la nena?

Yehova yange de Nebukadinesar, tor u Babilon lu ngohol ugeri vev môm môm. Kwa u hiihii u tor shon ngohol gar u Yerusalem la, yange kôr Tor Yehoyakin, man utyombaiorov kua ior mbafan ityav man mbafan tomaveegh, yem a ve cii ken Babilon. Shi yange kura ikyav mbi injaav mbi ken tempel u Yehova la cii yem a mi. Nebukadinesar maa hide ver Sedekia tor sha tar u Yuda.

Sha hiihii la, Sedekia lu ungwan Nebukadinesar. Kpa ityar i i dondo a tar u Yuda la man uprofeti mbaaiev wa Sedekia kwagh ér a hendan a tor u Babilon. Kpa Yeremia ta un icin ér: ‘Aluer u hendan a tor u Babilon yô, tar u Yuda ua tagher a ku man ijen man iangev.’

Sedekia tema tor ka kuman anyom anigheni yô, a hii u hendan kwagh a tor u Babilon. Yange za lôhô shoja i Igipiti ér i va wase un ityav. Tsô Nebukadinesar tindi shoja na ér i va ta num sha Yerusalem. Nahan shoja i Babilon va haa afo hen geri la, ve kase un ningir tser. Yeremia maa kaa a Sedekia ér: ‘Yehova kaa ér aluer u na iyol you sha ikyev i tor u Babilon yô, u war, kua geri ne cii. Kpa aluer u er nahan ga yô, Mbababilon vea nande Yerusalem vindi vindi shi vea kôr u vea yem a we vea za wuhe.’ Sedekia gema kaa a Yeremia ér: ‘Me na iyol yam sha ikyev i Babilon ga!’

 Shighe karen ka kom inyom i môm man iwer ataratar yô, shoja i Babilon gba kpekpe u Yerusalem ajiir wue wue, ve nyôr ken geri shon ve nande un. Yange ve nande tempel, shi ve wua ior kpishi, shi ve kôr ior udubu imôngo ve yem a ve ken Babilon.

Sedekia yange due ken Yerusalem lu yevese ér una war, kpa Mbababilon zenda un za kôr ikyua a Yeriko, maa ve hide a na hen Tor Nebukadinesar. Tor ne maa na zwa i wua ônov mba Sedekia mba nomso cii sha ashe a Sedekia. Shi na zwa i ongor Sedekia ashe, i tôô un i yem a na za lu ken Babilon zan zan kar kpen. Kpa Yehova tôndo zwa a Mbayuda ér: ‘Anyom 70 aa karen yô, me hide a ven ken Yerusalem, hen tar wen.’

Ka nyi yange i za er mbayev mba i kôr ve i yem a ve ken Babilon laa? Yange ve za hemen u civir Yehova ken tar la je he?

“[Yehova], Aôndo Uhembanagee, ajir a Ou a ôron ka sha mimi man sha jighjigh kpaa.”​—⁠Mpase 16:7