Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 112: Tso Ur ken Icile

Kwaghôron u sha 112: Tso Ur ken Icile

NENGE! kwagh tser tso la! Ngu hemben avur avur! Ú nenge a ior mba ve tsue ve haa shin mnger la kpa? Mbagenev ken a ve ôô due sha tar kera kpaa. Ka Paulu á lu heela laa? De se hen se fa kwagh u a lu zan hemen a na yô.

Ior mba waren tso u urun

Umbur, anyom ahar a a kar la cii i kôr Paulu lu uikangen ken Sesaria. Tsô un kua mbagenev cii i wa ve shin tso uikangen, man ve kôr gbenda yemen ken Roma. Shighe u ve va a̱r hen icile i Kreta yô, zegeahumbe ta sha ave. Ahumbe la ta taver je yô ior mbara kera fatyô u nahan tso ga. Man ve kera fatyô u nengen a iyange atetan shin asan tugh kpaa ga. Ken masejime, er ayange kar kpishi yô, mba ve lu shimi mbara ve kera lu a ishimaverenkeghen i waren mayange ga.

Tsô Paulu mough tile sha kaa er: ‘Or môm ken aven tsô kpaa nana kpe ga; ka tso tseegh una saa ye. Gadia nyen tugh ortyom u Aôndo va hen amo va kaa a mo er: “De cie ga, Paulu! Gadia saa u tile sha ishigh ki Shisar orhemen u Roma keng. Man Aôndo una yima mba ve lu zan zende ken mnger vea we la cii.” ’

Ken atôutu u iyange i sha 14 i ijeverahumbe la i hii kera yô, mbaeren tom shin tso mbara kav e̱r mngerem mara ma kera ze shimi yum ga yô! Er ve lu cian er alaghga tso á za ta sha kpetar sha avande ken ime yô, ve kende amandeatsoo a ve shin ityôtso. Sev mbu aven yô ve nenge a kpetar. Tsô ve nôngo sha u nahan tso la za aeren a mi sha waarawa u u lu shami la.

Ka shami, mba va mgbôghom sha kpetar yô, tso la kema shin inya maa hange. Tsô agôndoamnger gba tan sha mi, man tso la gba hemben avur avur. Torutya la kaa er: ‘Mba ve fe uwe u ôôn yô ve̱ vande haan mnger ve̱ za due sha tar. Ne mbagenev cii yô haa nen shin mnger ave imôngo, nahan kôr nen ave sha abamber a tsoo la.’ Man ka kwagh u ve e̱r je la. Kape i hii ve iorov iyenge 276 mba ve lu shin tso la cii ve war ve due sha tar doo doo je la, vough er ortyom la vande eren ityendezwa nahan.

Icile la mba yer i̱ er Melita. Ior i heregh la lu mba lun a mhôônom ma zungwen kpishi, nahan ve er a mba ve due shin tso mbara doo doo. Ahumbe nga wanger kpeghee yô, i wa Paulu shin tso ugen man i yem a na ken Roma.

Aerenakaa 27:1-44; 28:1-14.



Mbampin

  • Er tso u Paulu nyôr la lu karen ikyua a icile i Kreta yô, nyi kwagh i ere?
  • Paulu yange kaa a ior mba ve lu shin tso la ér nyi?
  • Yange i er nan ve tso la hembe avur avuru?
  • Torutya u lu hemen ve la kaa ér nyi, man ka iorov ume yange ve war ve due sha tara?
  • Mba yer iti i icile i yange ve due ve yem her la ér nyi, man ahumbe nga wanger kpeghee yô, i er a Paulu nena?

Mbampin mbagenev

  • Ôr Aerenakaa 27:1-144.

    Ka sea ôr kwagh u zende u Paulu za ken Roma la nahan, kwagh la ngu a taver vangertiôr wase sha mlu vough u Bibilo la nena? (Aer. 27:16-19, 27-32; Luka 1:3; 2 Tim. 3:16, 17)

  • Ôr Aerenakaa 28:1-14.

    Aluer yange ishima ia mgbegha mbafanaôndoga mba ken Melita la ve er a Paulu kua akar a na a tso ur a ve la doo doo yô, doo u ishima ia mgbegha Mbakristu u eren nyi, man hemban cii yô sha nyi gbenda? (Aer. 28:1, 2; Heb. 13:1, 2; 1 Pet. 4:9)