Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 109: Peteru Za Korneliu Inya

Kwaghôron u sha 109: Peteru Za Korneliu Inya

NGULA ka apostoli Peteru je a til heela la, man mba ve til ken jime na mbara ka ahuraior a na. Kpa er nan ve or ne a lu guren Peteru inya? Doo u ma a er nahanaa? Ú fa or shon kpa?

Peteru zua ishigh a Korneliu

Or la ka Korneliu. Un ka torutya u ikumuitya i Roma. Korneliu fa Peteru ga, kpa yange i kaa un er a̱ lôhô un sha u a̱ va hen ya na yô. De se hen se fa er yange kwagh ne va lu nahan yô.

Mbadondon mba Yesu mba hiihii mbara ve lu Mbayuda, kpa Korneliu yô ka Oryuda ga. Nahan cii kpaa Aôndo doo un ishima, ka a er msen hen a na, man shi ka a er aeren a dedoo kpishi hen ior kpaa. Ka shami, iyange igen yô ortyom va ande hen a na atetan man kaa a na er: ‘Saan Aôndo iyol a we, man ka u una na mlumun sha mbamsen ou kpaa. Yô tindi ior ve̱ za zua a orgen iti na er Peteru. Ngu ken Yopa hen ya u Shimon, u ya na a lu shin kpe u zegemnger la.’

Ka shami, hen shighe la je Korneliu tindi ior sha u ve̱ za ker Peteru yô. Kpernan, zum u ior mbara lu mgbôghom a Yopa la, Peteru unde lu sha haav mbu iyou i Shimon mbu mbu lu sha mi tembe tembe la. Shaala la Aôndo er un sha u a hen er un nenge a zegeikondo ngi senen sha. Ken ikondo la yô ishôso i sha won lu keregh atô kposo kposo. Sha tindi u Aôndo yô, ishôso ne i lu kwaghyan u hôngorough, nahan cii kpaa imo kaa er: ‘Mough sha, Peteru. Sôngo ya.’

‘Ei!’ Peteru na ikar nahan. ‘Mayange je m ngu a ya kwagh u hôngorough ga.’ Kpa imo la kaa a Peteru er: ‘De kera yilan kwagh u Aôndo á ser á ver yô wer ka kwagh u hôngorough ga.’ Kwagh ne er nahan kwa tar. Er lu nzughul Peteru ken ishima yum sha ikav i kwagh ne yô, ior mba Korneliu tindi ve la ve va a̱r hen ya la ve lu pinen sha u nengen a Peteru.

Peteru hungwa za hen ior mbara za kaa er: ‘Ka mo u ne lu keren je ne. Ka nyi ityôikyaa ne ve?’ Shighe u ior mban ve pase er ortyom va ande hen Korneliu man kaa a na er a̱ lôhô Peteru imôngo hen ya na nahan yô, Peteru man lumun u yemen a ve imôngo. Kper nan yô Peteru man ahuraior a na mough sha u zan Korneliu inya ken Sesaria.

Korneliu vande kohol anngôôv nav kua ahuraior a na ijiir i môm. Peteru va nyer yô, Korneliu za kohol un. A gba inya a gure hen angahar a Peteru, er ú nenge heen nahan. Kpa Peteru kaa er: ‘Mough tile sha; mo kpaa m ngu di or tsô.’ Een, Bibilo i̱ tese er ka shami ga u guren civir or. Ka u se civir Yehova tseegh.

Peteru man pase kwagh hen mba ve zua ijiir i môm la. ‘M nenge dedoo mer Aôndo lumun hanmaor cii u nan soo u civir un yô,’ Peteru kaa nahan. Man er a lu lamen ave la je, Aôndo tindi icighan jijingi na, man ior mbara ve hii u lamen ken ijô igenegh kposo kposo. Kwagh ne kpiligh mbahenen mba ve lu Mbayuda mba ve va vea Peteru la iyol, sha ci u yange ve hen er Aôndo we iko sha Mbayuda tseegh. Nahan kwagh ne tese ve er Aôndo nengen er ikurior igen i hemba igen shin i hemba ngin a iwasen hen Aôndo a ior mba ken ma ikur igen ga. Ngula ka kwagh u dedoo u i doo u se cii se umbur ga he?

Aerenakaa 10:1-48; 11:1-18; Mpase 19:10.



Mbampin

  • Or u a gur inya ken foto heen ne ka ana?
  • Ortyom yange kaa a Korneliu ér nyi?
  • Er Peteru unde sha tembe u haav mbu iyou i Shimon ken Yopa yô, Aôndo tese un nyi?
  • Peteru yange venda a Korneliu ér a de gur inya civir un ga sha ci u nyi?
  • Er nan ve yange i kpiligh Mbayuda mba ve lu mbahenen mba ve lu vea Peteru mbara iyolo?
  • Kanyi kwagh i injaa se hen ken mze u Peteru za Korneliu inya laa?

Mbampin mbagenev

  • Ôr Aerenakaa 10:1-48.

    Mkaanem ma Peteru ma i nger ken Aerenakaa 10:42 mara ma tese nyi sha kwagh u tom u pasen loho u dedoo u Tartor nee? (Mat. 28:19; Mar. 13:10; Aer. 1:8)

  • Ôr Aerenakaa 11:1-18.

    Peteru va kaven kwagh u Yehova wa ishima u eren a atôatyev jim jim yô, ka ieren i nyi yange tese, man se dondo ikyav na la nena? (Aer. 11:17, 18; 2 Kor. 10:5; Ef. 5:17)