Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 107: I Ta Sefanu Awen

Kwaghôron u sha 107: I Ta Sefanu Awen

OR U nan gur inya heen ne ka Sefanu. Un ka orhenen u jighjigh u Yesu. Kpa nenge ase kwagh u i lu eren un hegen ne! Ior mban mba tan un awen a vesen. Ka nyi i ne ve ve ker Sefanu ihom je i lu u vea er imba kwagh u kpilighyol ne nahana? De se nenge.

I ta Sefanu awen

Aôndo ngu wasen Sefanu sha u a̱ er uivande mba kpilighyol kpishi yô. Ior mban ve soo kwagh ne ga, nahan man ve nyôr kwaghnyiman a na sha itinekwagh i un ngu tesen ior mimi la. Kpa Aôndo na Sefanu mfe u vesen kpishi, nahan Sefanu tese er ior mban mba tesen akaa a aiegh. Kwagh ne na ishima hemba vihin ve ker cii. Nahan ve kôr un, man ve yila ior sha u ve̱ va ôr akaa a aiegh sha ityough nagh yô.

Pristi u tamen la pine Sefanu er: ‘Akaa ne ka mimii?’ Sefanu na mlumun sha u nan kwaghôron u dedoo u ken Bibilo. Ken mkur u kwaghôron shon yô, a ôr ve e̱r ngise mbaaferev ve kôr uprofeti mba Yehova mba sha ayange a tsuaa la ihom yô. Tsô a kaa er: ‘Ne mba vough er ior mbara nahan. Yange ne wua Yesu ortom u Aôndo, man shi ne mba kuran atindi a Aôndo ga.’

Kwagh ne na ishima hemba vihin mbahemenev mba kwaghaôndo cii! Ve gba yan anyi sha ishima vihin. Kpa hen shighe la Sefanu kende ashe sha, man a kaa er: ‘Nenge! M nenge a Yesu tile ken uwegh ku yanegh ku Aôndo sha.’ Er kwagh ne yô, ior mban ve cir ave sha ato a ve man ve hura ve ta sha Sefanu. Ve kôr un ve kpera ve due a na ken won gar.

Heen ne ve ér akondo ave a ken won ve na wanyekwaor Saulu sha u a nengen shami yô. Ú nenge a Saulu kpa? Tsô man ior mbagenev hii u tan Sefanu awen. Sefanu gure inya, vough er u fatyô u nengen nahan, man a e̱r msen hen Aôndo: ‘Yehova, de tsahan ve sha ci u kwaghbo ve ne ga.’ A fa e̱r mbagenev ken ave ka mbahemenev mba kwaghaôndo ve bum ve ye. Been kera yô Sefanu man kpe.

Shighe u or ka nana er u kwaghbo yô, ka ú nôngo sha u we kpaa ú er nanaa, shin ka u pine Aôndo wer a̱ er nan kwagha? Ka kwagh u Sefanu shin Yesu yange ve e̱r la ga. Yange ve lu a mhôônom ma zungwen hen mbara mba yange ve zungwe ve mhôônom ga je kpaa. De se nôngo sha u dondon ikav ve ne.

Aerenakaa 6:8-15; 7:1-60.



Mbampin

  • Ka an nan lu Sefanu, man Aôndo yange lu wasen un sha u eren nyi?
  • Sefanu yange ôr ér nyi ve ishima vihi mbahemenev mba kwaghaôndo mban yumu?
  • Ior mban yange ve kôr Sefanu ve kpela ve due a na ken won gar nahan, ve er un nyi?
  • Wanyekwaor u ú nenge a til hen ape i ver akondo ken foto heen ne ka ana?
  • Sefanu yange er msen hen Yehova sôn nyi cii ve mase kpene?
  • Shighe u or er se kwaghbo yô, se dondo ikyav i Sefanu la nahan se er nyi?

Mbampin mbagenev

  • Ôr Aerenakaa 6:8-15.

    Ka aeren a tsughun ior a nyi mbahemenev mba kwaghaôndo ve eren sha er vea nôngo yô vea yange tom u kwaghpasen u Mbashiada mba Yehova ve lu eren nee? (Aer. 6:9, 11, 13)

  • Ôr Aerenakaa 7:1-60.

    Kanyi yange i̱ wase Sefanu u palegh loho u dedoo iyol sha ishigh ki Mkohol u Mbaajiriv gbar gbara, man ikyav na ne tese se nyi? (Aer. 7:51-53; Rom. 15:4; 2 Tim. 3:14-17; 1 Pet. 3:15)

    Doo u se nenge ior mba ve hendan a tom wase la nena? (Aer. 7:58-60; Mat. 5:44; Luka 23:33, 34)