Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 105: U Keghen ken Yerusalem

Kwaghôron u sha 105: U Keghen ken Yerusalem

IOR mba ve lu heen ne ka mbadondon mba Yesu. Ve ungwa imo na nahan ve kegh ken Yerusalem. Man er ve cii ve lu keghen imôngo yô, ihyuran i taveraa va iv ken iyou la cii. Í hula inja er ijeverahumbe u taver nahan. Tsô iniombor i usu hii u duen sha ityough ki mbahenen mbara seer seer. Ú fatyô u nengen a usu la sha ityough ki hanmô ve kpa? Kwagh ne cii inja na kanyi?

Icighan jijingi haa sha mbahenen sha derianyom u hiihii la

Ka ivande! Yesu hide ngu sha vea Ter na, man ngu haan icighan jijingi u Aôndo sha mbadondon nav. Ú fa kwagh u jijingi ne a tuur ve u eren kpa? Ve cii ve hii u lamen ken ijô kposo kposo.

Ior kpishi ken Yerusalem ve ungwa ayôôso a a hula er ka ijeverahumbe la, man ve va sha u vea va nenge kwagh u a lu zan hemen yô. Ior mbagenev ken a ve ka mba ken itiar igen mba ve ve heen sha ci u iniongo i Mbaiserael i Pentekosti la yô. Mbavannya mban ve nenge a kwagh u kpiligh ve iyol tsô! Ve ungwa mbahenen mban ve lu lamen ken ijô ve sha akaa a kpilighyol a Aôndo a er yô.

‘Ior mban cii ka mba ken Galilia,’ mbavannya mbara kaa nahan. ‘Tsô, er nan ve ve fetyô u lamen ken ijô igen kposo kposo i itiar igen ape se dugh nee?’

Peteru man mough tile sha u pasen ve. A kende imo na sha man a pase ior sha er yange i wua Yesu man shi er Yehova nder un shin mbapkenev nahan. ‘Hegen Yesu ngu sha ken uwegh ku yanegh ku Aôndo,’ Peteru kaa nahan. ‘Man a haa icighan jijingi u a tôndozwa shami la. Ka nahan ve ne nenge shi ne ongo uivande mban ye.’

Ka shami, shighe u Peteru ôron akaa ne cii yô, sôr ior kpishi ken asema sha kwagh u yange i er a Yesu la. ‘Kanyi se ere?’ ve pine nahan. Peteru kaa a ve er: ‘Gba u ne gema asema a en shi á er ne batisema.’ Nahan sha iyange shon la je iorov kuma er 3,000 nahan mba i er ve batisema man ve hingir mbadondon mba Yesu yô.

Aerenakaa 2:1-47.



Mbampin

  • Er foto ne a tese nahan, kanyi i er mbadondon mba Yesu mba ve lu keghen ken Yerusalem laa?
  • Ka kwagh u kpilighyol u nyi mbavannya mba yange ve va ken Yerusalem mbara ve nenge a mini?
  • Peteru yange pase ior mbara nyi kwagha?
  • Ior mbara yange mba ongo kwagh u Peteru ôr la cii yô, lu ve ken asema nena, man Peteru gema kaa a ve ér ve er nyi?
  • Ka iorov ume yange ve er batisema sha iyange i Pentekosti u 33 S.W. laa?

Mbampin mbagenev

  • Ôr Aerenakaa 2:1-47.

    Ka nena mkaanem ma Peteru ma i nger ken Aerenakaa 2:23, 36 la ma tese ér ikyurior i Mbayuda jimin cii yange i̱ wa uwegh sha ku u Yesu? (1 Tes. 2:14, 15)

    Peteru yange ver ikyav i dedoo i henen kwagh a ior ken Ruamabera nena (Aer. 2:16, 17, 29, 31, 36, 39; Kol. 4:6)

    Peteru yange yar tom a ishindan i hiihii ken “uishindan mba tartor u Sha” mba Yesu yange tôndozwa ér una na un la nena? (Aer. 2:14, 22-24, 37, 38; Mat. 16:19)