Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 104: Yesu Kôndo Yem Sha

Kwaghôron u sha 104: Yesu Kôndo Yem Sha

ER AYANGE kar yô, Yesu tese iyolna hen mbadondon nav kwa kpishi kpishi. Kwa ugen je yô mbahenen nav 500 ve nenge a na. Shighe u a ande hen ave la, ú fa kwagh u Yesu ôr a ve kpa? Lu kwagh u tartor u Aôndo. Yehova yange tindi Yesu shin tar sha u a̱ va tese kwagh u Tartor. Man a za hemen u eren kwagh ne shin er i nder un shin mbakpenev kera la kpaa.

Yesu hide ngu kôndon yemen sha

Ú umbur kwagh u a lu tartor u Aôndo kpa? Een, Tartor la ka gomoti u Aôndo jim jim u a lu sha yô, man Yesu ka Un Aôndo a tsough er a̱ lu tor ye. Er se hen nahan, Yesu yange tese inja tor i kpilighyol i una lu la sha u koson mba ijen i ker ve mbara, been mbauangev angev vev, man shi sha u nderen mbapkenev hingir mbaumav heregh!

Nahan shighe u Yesu una hingir tor sha anyom dubu la, tar ua lu nena? Een, a gema tar cii ua hingir paradiso u doonashe. Ityav mbia kera lu ga, shin ifer, shin angev, shin ku je kpaa ga. Se fa kwagh ne sha ci u Aôndo yange er paradiso sha ci u ior ve̱ lu ker a iember yô. Ka sha ci u nahan a er sule u Eden sha hiihii la ye. Man Yesu una nenge er kwagh u Aôndo a soo er a̱ lu la una lu shami vough ken masejime.

Shighe va kuma u Yesu una hide una yem sha yô. Ken atô u ayange 40 Yesu lu tesen iyolna hen mbahenen nav. Nahan ve fa dedoo je er ngu uma. Kpa cii man a undu mbahenen nav yô a kaa a ve er: ‘Lu nen ken Yerusalem zan zan ne ngohol icighan jijingi.’ Icighan jijingi ka tahav mbu tomov mbu Aôndo, e̱r ahumbe a karen nahan, u una wase mbadondon nav sha u eren ishima i Aôndo yô. Ken masejime yô, Yesu kaa er: ‘Ka u ne pase kwagh wam zan zan á ar ken ikighir i tar je.’

Er Yesu ôr kwagh ne bee kera yô, kwagh u kpilighyol kpishi er. A hii u kôndon yemen sha, vough er u nenge heen nahan. Tsô man ibeenegh ngohol un, man mbahenen kera nenge a Yesu ga. Yesu yem sha, man a hii mtemtor sha mbadondon nav shaala.

Mbahenen lu kenger sha kwavaôndo

1 Mbakorinte 15:3-8; Mpase 21:3, 4; Aerenakaa 1:1-11.



Mbampin

  • Ka mbahenen ume yange ve nenge a Yesu sha kwa u gen laa, man yange lam a ve sha nyi kwagha?
  • Tartor u Aôndo ka nyi, man shighe u Yesu una tema tor anyom dubu la, uma una lu nena sha tara?
  • Ka ken atô u ayange a me Yesu ande hen mbahenen nava, man hegen shighe kuma u una er nyi?
  • Cii man Yesu undu mbahenen nav yô, á kaa a ve ér ve er nyi?
  • Kanyi i lu eren ken foto heenee, man kanyi yange i yisa Yesu ve mbahenen nav kera nenge a na ga?

Mbampin mbagenev

  • Ôr 1 Mbakorinte 15:3-8.

    Er nan ve apostoli Paulu yange ôr kwagh u mnder u shin ku u Yesu vangertiôrô, man kanyi akaa nahan Mbakristu nyian vea fatyô u lamen sha mi gbar gbara? (1 Kor. 15:4, 7, 8; Yes. 2:2, 3; Mat. 24:14; 2 Tim. 3:1-5)

  • Ôr Aerenakaa 1:1-11.

    Er i tsengeôron ken Aerenakaa 1:8 nahan, tom u pasen kwagh ne samber ar hana? (Aer. 1:8; 6:7; 9:31; 11:19-21; Kol. 1:23)