Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 102: Yesu Ngu Uma

Kwaghôron u sha 102: Yesu Ngu Uma

Ú FA kwase ne kua iorov mba uhar mban kpa? Kwase ne ka Maria Magedalena, huror u Yesu. Man iorov mba uhar mba ve hua akondo a pupuu ne yô ka mbatyomov. Anyou u cuku u Maria a lu gbilin ashe kenger ker ne ka ijiir i yange i ver ikom i Yesu shighe u a kpe kera je ne. Mba yer í er uwar. Kpa hegen ne iyol la kera ngi ga! Ka an nan tee í? De se nenge.

Mbatyomov mba lamen a Maria Magedalena

Er Yesu kpe kera yô, upristi mbara kaa a Pilatu er: ‘Shighe u Yesu lu uma la a kaa er ayange atar aa kar kera yô a nder un. Nahan yô na zwa sha u i kura uwar la yô. Sha er mbahenen nav vea kera za ii iyol na tsô vea kaa er i nder un shin mbakpenev ga yô!’ Pilatu kaa a upristi er ve̱ tindi mbakuran ve̱ za kura uwar la.

Kpa pepe pepe sha iyange i sha utar er Yesu kpe kera yô ortyom u Yehova za va. A menger iwen i sha hunda u uwar la kera. Mciem gba mbakuran mbara iyol je ve fatyô u tenger tsô kpaa ga. Ken masejime yô, mba nengen ken atô u uwar shon yô, iyol la kera lu ga! Mbagenev ken mbakuran mbara nyôr ken gar za kaa upristi mbara. Ú fa kwagh u upristi mbaaferev mbara ve er kpa? Ve kimbi mbakuran mbara inyaregh sha u ve̱ er aie yô. ‘Kaa nen ner mbahenen nav nyen ve va tugh, shighe u se lu mnya yô, nahan ve va ii iyol na,’ ka kwagh u upristi mbara ve ôr a mbakuran je la.

Hen shighe ne yô, ahuraior aa ukase a Yesu a genegh va hen uwar la. Kpiligh ve iyol kpishi sha u kaven ér uwar la ngu gbilin! Fese nahan mbatyomov uhar mba ve haa akondo a kungun segh segh yô ande. ‘Er nan ve ne lu keren Yesu heen-e?’ ve pine nahan. ‘I nder un. Yem nen fefa za kaa nen mbahenen nav.’ Kasev mbara yevese fefa tsô! Kpa e̱r ve lu yemen sha gbenda yô ve kohol orgen. Ú fa or shon kpa? Ka Yesu! ‘Za kaa nen mbahenen av,’ a kaa nahan.

Shighe u kasev mbara ve ôr mbahenen er Yesu ngu uma man shi er ve nenge a na kpaa yô, taver mbahenen kpishi u nan jighjigh. Peteru man Yohane ve kar ayem ve za hen uwar la sha u vea za nenge ayol ave yô, kpa uwar la lu gbilin! Peteru man Yohane mba yemen kera yô, Maria Magedalena yem ga lu her. Ka shighe u a kenger ker man a nenge a mbatyomov mba uhar mban je la.

Ú fa kwagh u a er i iyol i Yesu kpa? Aôndo e̱r sha er ia ndiir yô. Aôndo yange nder Yesu ken iyol na i inyam man awambe í yange kpe a mi la ga. Yange na Yesu iyol i he i ken jijingi, vough er mbatyomov mba shaav ve lu a mi nahan. Kpa sha u tesen mbahenen nav er un ngu uma yô, Yesu una fatyô u tôôn iyol i ior vea fatyô u nengen a min yô, er se va hen nahan.

Mateu 27:62-66; 28:1-15; Luka 24:1-12; Yohane 20:1-12.



Mbampin

  • Kwase u a lu ken foto heen ne ka ana, iorov mba uhar mbara di ka unô, man ka han ve lu?
  • Hii nan ve Pilatu yange kaa a upristi ér ve tindi mbakuran ve za kura uwar u Yesu?
  • Kanyi ortyom yange er pepe pepe sha iyange i sha utar er Yesu kpe laa, kpa upristi di gema er nyi?
  • Hii nan ve yange kpiligh kasev mbagenev iyol zum u ve za sôr uwar u Yesu?
  • Hii nan ve Peteru man Yohane yange ve kar ayem ve za hen uwar u Yesu, man lu nyi ve nenge a mini?
  • Kanyi yange i er a iyol i Yesu, kpa yange gema er nyi sha er mbahenen nav vea fa ér un ngu uma?

Mbampin mbagenev

  • Ôr Mateu 27:62-66 man 28:1-15.

    Upristi mbatamen man Mbafarishi kua mbatamen yange ve er icighan jijingi isholibo sha shighe u Yesu nder shin ku la nena? (Mat. 12:24, 31, 32; 28:11-15)

  • Ôr Luka 24:1-12.

    Kwagh u mnder u Yesu shin ku la tese ér Yehova nenge kasev ér mba mbashiada mba a fatyô u nan ve jighjigh nena? (Luka 24:4, 9, 10; Mat. 28:1-7)

  • Ôr Yohane 20:1-12.

    Yohane 20:8, 9 wase u nengen a ityôkyaa i wan ishima aluer se kav m-iv u ma kwaghôron u profeti u i nger ken Bibilo ga je kpaa nena? (Anz. 4:18; Mat. 17:22, 23; Luka 24:5-8; Yoh. 16:12)