Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 98: Sha Uwo u Olev

Kwaghôron u sha 98: Sha Uwo u Olev

NGUN ka Yesu sha Uwo u Olev je ne. Iorov mba unyiin mba ve lu vea na ne ka mbaapostoli nav. Mba ve lu anngôôv yô ka Anderia man Peteru, kua shi anngôôv Yakobu man Yohane. Ngula ka tempel u Aôndo u ken Yerusalem je ú nenge a mi keela ca la.

Kuma hegen ayange ahar er Yesu nyôr ken Yerusalem sha wanjaki yô. Ka Tomahar. Pepe ken sev mbula Yesu lu ken tempel. Keela la upristi nôngo er vea kôr Yesu vea wua un. Kpa ve lu a mciem iyol sha ci u ior soo Yesu.

Yesu man mbaapostoli nav

‘Ne iyô kua shi ônov mba iyôôv mban!’ Yesu yila mbahemenev mba kwaghaôndo mban nahan. Tsô Yesu kaa er Aôndo una tsaha ve sha ci u akaabo a ve er la cii. Been kera yô Yesu maa unde sha Uwo u Olev, man mbaapostoli mba unyiin mban ve hii u pinen un mbampin. Ú fa kwagh u ve lu pinen Yesu kpa?

Mbaapostoli mba pinen kwagh sha akaa a ken hemen. Ve fa je er Yesu una va bee a hanma inja ifer cii sha tar. Kpa ve soo u fan shighe u kwagh ne una va e̱r yô. Ka hanma shighe Yesu shi una va tema Toro?

Yesu fa je er mbadondon un mba ve lu shin tar ne vea fatyô u nengen a na shighe u una hide una va la ga. Kwagh ne una lu nahan sha ci u un una lu sha, man ve vea fatyô u nengen a na shaala ga. Nahan Yesu ôr mbaapostoli nav akaa a genegh a aa lu eren shin tar sha shighe u una lu sha hemen u Tor shaala yô. Akaa ne a genegh ka nyi?

Yesu kaa er ityav mbi vesen mbia lu, ior kpishi vea lu uange shi vea lu ijen, ifer i̱ bo ia lu kpishi, man ityartenger i vesen kpaa ia lu. Yesu shi kaa er á pase loho u dedoo u tartor u Aôndo hanma ijiir sha tar cii. Se mba nengen akaa ne nga eren sha ayange a ase ne kpa? Een! Sha ci u nahan yô se fa dedoo je ser Yesu ngu hemen sha hegen. Shi kpeghee tsô una bee a hanma kwaghbo shin tar.

Mateu 21:46; 23:1-39; 24:1-14; Marku 13:3-10.



Mbampin

  • Ka hanma ijiir Yesu a tem her ken foto nee, man ka unô ve lu vea na laa?
  • Upristi nôngo ér vea er Yesu nyi ken tempele, Yesu di gema kaa a ve ér nyi?
  • Mbaapostoli pine Yesu ér nyi?
  • Hii nan ve Yesu yange ôr mbaapostoli nav akaa agenegh a aa lu eren shin tar shighe u una tema Tor sha laa?
  • Kanyi akaa Yesu a kaa ér aa er cii ve una mase karen a ifer sha tar kera ciilii?

Mbampin mbagenev

  • Ôr Mateu 23:1-39.

    Shin er Ruamabera a tese ér ka sha mi u yilan ior sha atiatom a taregh nahan kpa, kanyi mkaanem ma Yesu ma i nger ken Mateu 23:8-11 la ma tese sha kwagh u yilan ior atiatom a kenden a or sha ken tiônnongo u Kristu laa? (Aer. 26:25; Rom. 13:7; 1 Pet. 2:13, 14)

    Kanyi yange Mbafarishi eren sha u yangen ior u hingir Mbakristu, man ka sha nyi gbenda mbahemenev mbaaduav mba sha ayange ne kpa ve eren kwagh shon mômô? (Mat. 23:13; Luka 11:52; Yoh. 9:22; 12:42; 1 Tes. 2:16)

  • Ôr Mateu 24:12-14.

    Í pase mluainja u ishimawan ken Mateu 24:13 nena?

    Inja i ishember i “mkur” i í ter ken Mateu 24:13 la ér nyi? (Mat. 16:27; Rom. 14:10-12; 2 Kor. 5:10)

  • Ôr Marku 13:3-10.

    Kanyi ishemberkwaghôron i̱ ken Marku 13:10 i̱ tese mlu torough torough u tom u pasen loho u dedoo nee, man doo u mkaanem ma Yesu man ma a bende a vese nena? (Mar. 13:10; Rom. 13:11, 12; 1 Kor. 7:29-31; 2 Tim. 4:2)