Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 97: Yesu Va sha Inja i Tor

Kwaghôron u sha 97: Yesu Va sha Inja i Tor

ER A bee mbaapirashe mba uhar mbara angev anshighe kar kpeghee yô, Yesu nyôr ken angar u kiriki ugen u a lu ikua a Yerusalem la. A kaa a mbahenen nav uhar er: ‘Nyôr nen ken angar la tsô ne nenge a wanjaki. Sagh un va nen a mi hen a mo.’

Mba ve a jaki shon hen a na yô, Yesu tema shami. Tsô a henda a nyôr ken Yerusalem u a lu ikua la. Za zulum a gar yô, zege ikpelaior due va sha u kohol un. Mbakpishiv ken a ve sagh akondo ave samber sha gbenda. Mbagenev asegh andar a avilegh. Ve samber á kpaa sha gbenda, man shi ve genger amo ve kaa er: ‘Aôndo a̱ ver tor u á vé ken iti i Yehova la!’

Ior due va sha u kohol un

Ngise ngise la ken Iserael yô utor ve henda wanjaki ve nyôr ken Yerusalem sha u tesen ayolave hen ior. Ka kwagh u Yesu a lu eren je ne. Man ior mban kpaa mba tesen je er ve soo er Yesu a̱ lu tor ve. Kpa ka ior cii ve soo un ga. Se fatyô u nengen nahan sha kwagh u a er shighe u Yesu nyôr ken tempel la.

Ken tempel la Yesu bee ior angev mba ve pir ashe kua mba ve sombo angahar kpaa. Er mbayev mbakiriki ve nenge kwagh ne yô, ve gba genger amo wuese Yesu. Kpa kwagh ne na upristi ishimavihin kpishi, man ve kaa a Yesu er: ‘Ú ungwa kwagh u mbayev mbakiriki ve lu ôron la kpa?’

‘Een, m ungwa,’ Yesu na ikar nahan. ‘Ne vande ôron ken Bibilo ape i nger er: “Ka ken zwa u anikyundanev man Aôndo una sôr iwuese ye” gaa?’ Nahan mbayev mbakiriki mbara ve za hemen u wuese tor u Aôndo na la.

Se soo ser se lu e̱r mbayev mbakiriki mbara nahan, shin se soo ga? Alaghga ior mbagenev vea nôngo er vea yange se u ôron kwagh u tartor u Aôndo. Kpa se za hemen u pasen ior akaa a kpilighyol a Yesu una va er sha ci u ior la.

Yange lu a̱ kuma shighe u Yesu una hii u hemen sha inja i tor sha shighe u yange lu shin tar la ga. Á va lu hanma shighe? Mbahenen mba Yesu ve soo u fan. Ka kwagh u se ôr hegen je ne.

Mateu 21:1-17; Yohane 12:12-16.



Mbampin

  • Er Yesu va nyer ken gar u kiriki ugen ikyua a Yerusalem yô, á kaa a mbahenen nav ér ve er nyi?
  • Ú nenge foto u a lu heen ne nahan, Yesu za zurum a gar u Yerusalem yô, nyi i ere?
  • Kanyi kwagh mbayev mba kiriki yange ve er zum u ve nenge Yesu lu bughun mbapirinashe ashe man lu been ior mba sombon angahar angeve?
  • Yesu kaa a upristi mba ishima lu vihin ve la ér nyi?
  • Se lu er ka mbayev mba kiriki mba yange ve wuese Yesu la nena?
  • Kanyi yange mbahenen mba Yesu soo u fana?

Mbampin mbagenev

  • Ôr Mateu 21:1-17.

    Mnyer u Yesu nyôr ken Yerusalem sha inja i Tor la kaha kposo a ukurmbautyaav mba ve za hemba ityav sha shighe u Mbaroma la sha nyi gbenda? (Mat. 21:4, 5; Sek. 9:9; Fil. 2:5-8; Kol. 2:15)

    Mbayev mba kiriki vea hen nyi ken kwagh u mbayev mba ken Iserael mba yange ve ôr kwagh u i nger ken Pasalmi 118 zum u Yesu nyôr ken tempel laa? (Mat. 21:9, 15; Ps. 118:25, 26; 2 Tim. 3:15; 2 Pet. 3:18)

  • Ôr Yohane 12:12-16.

    Andar a avilegh a ior mban yange ve kôr sha ave ve lu wuese Yesu la tile sha nyi? (Yoh. 12:13; Fil. 2:10; Mpa. 7:9, 10)