Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 92: Yesu Nder Mbakpenev

Kwaghôron u sha 92: Yesu Nder Mbakpenev

INIUNKWASE í ú nenge a mi heen ne ngi anyom 12. Yesu ngu kôron un uwegh, man ngô na kua ter na ve tile ikua. Ú fa er i hii ve vé lu saan saan nahan kpa? De se hen se fa.

Yesu nder wan u Yairu u kwase

Ter u iniunkwase ne ka zegeor je iti na er Yairu. Iyange igenegh yô wan na u kwase gba angev kpishi, man í kôr un gambe. Kpa á zua a guda ga. Angev nav mbura mbu hemba yemen hemen hemen cii. Ishima za Yairu kua kwase na iyol kpishi je, sha ci u ka inja er wanakiriki ve u kwase ne una kpe nahan. Ka cii wan ve u kwase je ne. Nahan Yairu yem u keren Yesu. A vande ungwan uivande mba Yesu lu eren la.

Shighe u Yairu va zua a Yesu la, ikpelaior i̱ kase un kpishi. Kpa Yairu nyôr ken ikpelaior la man a gba hen angahar a Yesu. ‘Wan wam u kwase ngu uange kpishi, kpishi je,’ a kaa a na nahan. ‘Wea lumun yô, va va bee un mbú,’ a zamber nahan. Yesu kaa er una za.

E̱r ve lu yemen sha gbenda yô, ior lu tuur sha u vea kporom a na ikua yô. Fese nahan man Yesu tile. ‘Ka an nan bende a mo?’ kape a pine la. Yesu kav er tahav due ken a na kera, nahan a fa er or nan bende a na. Kpa ka ana? Ka kwase u á lu uange kpishi kuma anyom 12 yô. Yange kporom va bende a ikyondo i Yesu, man angev nav mbu bee!

Kwagh ne na Yairu mpever ken ishima, sha ci u a nenge er i lu Yesu kwagh u ican ga u been or angev nahan. Kpa hen shighe la man ortyom za va. ‘De kera ze Yesu iyol ga,’ a kaa a Yairu nahan. ‘Wan wou u kwase kpe.’ Yesu ungwa kwaghôron ne nahan a kaa a Yairu er: ‘Ishima i̱ de zeu iyol ga, kwagh á er un ga.’

Shighe u mba za nyer hen ya u Yairu yô, ior lu vaan a ijungwen kpishi je. Kpa Yesu kaa er: ‘De vaan nen ga. Wanakiriki la kpe ga. Ngu yaven a yav tsô.’ Kpa ve se shi ve naha Yesu tar, sha ci u ve fa dedoo er a kpe.

Tsô Yesu kua a ter man ngô u wanyekwase la kua mbaapostoli nav utar ve nyôr ken iyou i̱ i gbir wan shon la. A kôr un sha uwe man a kaa er: ‘Mough sha!’ Tsô a nder, vough er ú nenge heen nahan. Man a mough shi a zende sha kpaa! Ka ityôkyaa i i ne ve ngô na man ter na ve lu saan saan yum, yum je ne.

Ka or u hiihii u yange Yesu nder nan shin ku ne ga. U hiihii u Bibilo i̱ ôr kwagh sha mi yô ka wan u kwasecôghol u a lu ken gar u Nain la. Ken hemen yô, Yesu shi nder Lasaru, anmgbian u Maria man Marta, shin mbakpenev. Shighe u Yesu una va hingir tor u Aôndo una na la yô, una hide a ior kpishi, kpishi je vea hingir uma. Kwagh la na se msaanyol ga he?

Luka 8:40-56; 7:11-17; Yohane 11:17-44.



Mbampin

  • Ka ana nan lu Ter u iniunkwase i̱ ú nenge a í ken foto heen ne, man ka nyi i ne ve i ze or ne kua kwase na iyol yumu?
  • Yairu yange za zua a Yesu nahan, a er nena?
  • Er Yesu lu yemen ken ya u Yairu yô, kanyi kwagh yange i ere, man kanyi loho nahan yange i va ôr Yairu sha gbenda?
  • Hii nan ve ior mba ken ya u Yairu lu sen Yesu?
  • Yesu kua a mbaapostoli utar man ter u iniunkwase ne kua ngô na nyôr a ve ken iyou i iniunkwase ne, nahan a er nyi?
  • Ka ana ugen kpa Yesu nder shin mbakpeneve, man kwagh ne tese nyi?

Mbampin mbagenev

  • Ôr Luka 8:40-56.

    Yesu yange lu a mhôônom ma zungwen sha kwase u lu a imborawambe la shi er kwagh a na sha ishima i legh legh nena, man kanyi mbatamen mba ken Kristu vea hen sha kwagh ne nyiana? (Luka 8:43, 44, 47, 48; Lev. 15:25-27; Mat. 9:12, 13; Kol. 3:12-14)

  • Ôr Luka 7:11-17.

    Er nan ve ior mba or u doon ve ishima nan saa ku la vea zua a ishimasurun ken kwagh u Yesu yange er a kwasecôghol u ken Nain laa? (Luka 7:13; 2 Kor. 1:3, 4; Heb. 4:15)

  • Ôr Yohane 11:17-24.

    Yesu yange tese ér ka vough u vaan ku u or u doon we ishima nena? (Yoh. 11:33-36, 38; 2 Sam. 18:33; 19:1-4)