Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 90: Vea Kwase hen Kpejôr

Kwaghôron u sha 90: Vea Kwase hen Kpejôr

YESU tile hen kpejôr ken Samaria sha u una mem yô. Mbahenen nav nyôr ken gar u za yamen kwaghyan. Kwase u Yesu a lu lamen a na ne a va sha u una va kese mngerem yô. A kaa a na er: ‘Nam mngerem m ma.’

Yesu ngu lamen a kwase Samaria

Kwagh ne kpiligh kwase ne iyol kpishi je. Ú fa ityôkyaa kpa? Ka sha ci u Yesu ka Oryuda, man un ka kwase Samaria. Man Mbayuda kpishi soo Mbasamaria ga. Mba lamen a ve tsô kpaa ga! Kpa Yesu soo hanma injaor cii. Nahan a kaa er: ‘Aluer wea fe or u nan lu sônon we mngerem ne yô, ma u sen un ma a neu mngerem ma umam.’

Kwase la kaa er: ‘Tere, ijôr ne i̱ za, man u ngu a bokoti tsô kpaa ga. Tsô ka hana u zua a mngerem ma umam mana?’

‘Aluer ú ma mngerem man yô imura shi ia kôrou,’ Yesu pase un nahan. ‘Kpa mngerem ma me nau la maa fatyô u nan or uma u tsôron.’

Kwase la kaa er: ‘Tere, shi nam mngerem man! Tsô imura ia kera kôrom mayange ga. Man shi me kera vaan heen sha u va kesen mngerem kpaa ga.’

Kwase la hen er Yesu ngu ôron kwagh u mnger jim jim. Kpa ngu ôron ka kwagh u mimi u Aôndo man tartor na. Mimi ne ngu inja er ka mngerem ma nan uma nahan. Una fatyô u nan or uma u tsôron.

Yesu shi kaa a kwase la er: ‘Za za yila nomou nahan va nen imôngo.’

‘M ngu a nom ga,’ a kaa nahan.

‘U kaa ka shami vough,’ Yesu kaa nahan. ‘Kpa ú vande lun a noov utaan, man or u ú lu vea na hegen ne kpaa ka nomou ga.’

Cier kwase la iyol, sha ci u kwagh ne cii lu mimi. Yesu yange er nena ve fa akaa ne ciilii? Een, ka sha ci u Yesu ka Un u i Tôndozwa sha na u Aôndo tindi la, nahan Aôndo na un mkaanem man. Hen shighe ne mbahenen mba Yesu za hide, tsô kpiligh ve iyol er a lu lamen a kwase Samaria yô.

Kanyi se hen sha kwagh ne ciilii? Kwagh ne tese er Yesu ngu a mhôônom ma kôron sha hanma ikurior cii. Man se kpaa doo u se lu a min nahan. Se gba henen tsô ser ior mbagenev ka mbabov sha ci u ve due ken ikur igen yum ga. Yesu soo er ior cii ve̱ fa mimi u una na uma u tsôron la. Man se kpaa doo u se lu a isharen i wasen ior sha u ve̱ hen mimi yô.

Yohane 4:5-43; 17:3.



Mbampin

  • Er nan ve Yesu a lu hen kpejôr ken Samaria, man ngu ôron a kwase la ér nyi?
  • Hii nan ve i kpiligh kwase la iyolo, Yesu kaa a na ér nyi, man er nan ve á er kwagh laa?
  • Kwase la hen ér ka mngerem ma nyi Yesu lu ôron kwagh u ma, kpa lu mngerem ma nyi jighilii Yesu lu ôron kwagh u ma?
  • Hii nan ve kpiligh kwase la iyol sha akaa a Yesu fa sha iyol na laa, man er na ve fa akaa shon ciilii?
  • Se hen nyi sha kwagh u kwase u hen kpejôr laa?

Mbampin mbagenev

  • Ôr Yohane 4:5-43.

    Aluer se dondo ikyav i Yesu la yô, se eren a ior mba kwavyolough ve u kaha a u̱ wase shin ve dugh sha ajiir agen kposo a vese la nena? (Yoh. 4:9; 1 Kor. 9:22; 1 Tim. 2:3, 4; Titu 2:11)

    Ka mbamtsera mba nyi nahan or u nan hingir orhenen u Yesu ka nan zua a mi? (Yoh. 4:14; Yes. 58:11; 2 Kor. 4:16)

    Se tese ser se mba a iwuese, er kwase Samaria u yange i maa un iyol u pasen mbagenev kwagh u hen la nahan nena? (Yoh. 4:7, 28; Mat. 6:33; Luka 10:40-42)