Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 86: Ishan Tese Ior Gbenda

Kwaghôron u sha 86: Ishan Tese Ior Gbenda
Mbatimen sha kwagh u Asan

Ú NENGE a iwanger i ishan i̱ or môm ken ior mban a lu tesen uwegh sha i̱ la kpa? Shighe u ve mough ken Yerusalem yô, ishan la i̱ due. Ior mban ka ior mba sha Ityoughkitaregh, man mba timen sha kwagh u asan. Ve na jighjigh er ishan i he ne ngi hemen ve yemen a ve hen or u nan lu zegeor yô.

Shighe u ior mban mba va nyer ken Yerusalem yô, ve pine er: ‘Ka hana wanakiriki u i lu u una va lu tor u Mbayuda la á lu?’ “Mbayuda” ka iti igen i Mbaiserael. ‘Yange se hii nengen a ishan i wanakiriki la shighe u se lu sha Ityoughkitaregh yô,’ ior mbara kaa nahan, ‘man se va sha u se va civir un yô.’

E̱r Herode, un u á lu tor ken Yerusalem la, ongo kwagh ne yô ishima vihi un kpishi. A soo er tor ugenegh nana̱ kar nana̱ ngohol ikônough nagh ga. Nahan Herode yila upristi nav mba tamen pine ve er: ‘Ka hana i lu u a mar tor u i tendezwa laa?’ Ve na mlumun er: ‘Bibilo i̱ kaa er ka ken Betelehem.’

Nahan Herode yila ior mba sha Ityoughkitaregh mbara, a kaa a ve er: ‘Za za time nen sha kwagh u wanikundan la doo doo. Nea zua a na yô, va ôrom nen. Mo kpaa m soo u me za civir un yô.’ Kpa, sha mimi yô, Herode yange soo u una zua a wan la una wua un!

Tsô ishan la i yem ken hemen ve zan zan i za a̱r ken Betelehem, man i̱ za tile hen ijiir i wan la lu la. Er ior mbara ve nyôr ken atô u iyou la yô, ve nenge a Maria man wanakiriki Yesu. Ve dugh uiwua ve na Yesu. Kpa ken hemen yô Yehova ta ve icin ken mnya er ve̱ de kera hiden ve zaan hen Herode ga. Nahan ve hide ve kar gbenda ugenegh ve yem ken tar ve.

Shighe u Herode ungwa ér ior mba sha Ityoughkitaregh mbara ve hide ve yem ken tar ve yô, ishima i vihi un kpishi je. Nahan a na zwa er i̱ wua anikyundanev mba ken Betelehem mba ve kom er anyom ahar nahan hide ijime cii yô. Kpa Yehova vande tan Yosev icin ken mnya, nahan Yosev kua tsombor na ve yem ken Igipiti. Ken hemen, er Yosev ungwa er Herode kpe kera yô, a tôô Maria man Yesu a hide a ve ken Nasareti. Ka hen ape Yesu vese je ne.

Ka ana ú hen wer yange nan e̱r ishan i he la i ta iwanger-e? Umbur, ior mbara yange ve hii yemen ken Yerusalem e̱r yange ve nenge a ishan la kera yô. Satan Diabolo yange soo u wuan Wan u Aôndo, man shi yange fa er Tor Herode u Yerusalem una nôngo sha u wuan un. Nahan ka Satan keng yange er ishan la i̱ ta iwanger ye.

Mateu 2:1-23; Mika 5:2.



Mbampin

  • Ior mba ve lu ken foto ne ka unô, man hii nan ve orgen la a hônon uwer sha ishan i wanger laa?
  • Er nan ve ishima i vihi Herode, man a er nyi?
  • Ishan la yange i hemen ior mban i za a ve hana, man hii nan ve yange ve due gbenda ugen ve yem ken tar ve?
  • Herode wa tindi ér nyi, man lu sha ci u nyi?
  • Yehova kaa a Yosev ér a̱ er nyi?
  • Ka ana yange nan due a ishan i he la, man lu sha ci u nyi?

Mpin ugen

  • Ôr Mateu 2:1-23.

    Yesu lu anyom a me sha shighe u mbatimen sha kwagh u asan ve va nenge un laa, man yange lu hana? (Mat. 2:1, 11, 16)