Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 85: I Mar Yesu ken Ityôruile

Kwaghôron u sha 85: I Mar Yesu ken Ityôruile

Ú FA wanikundan u á lu heen ne kpa? Een, ka Yesu. I sember maren un ken ityôruile. Ityôruile ka ijiir i ilev mbi tse yô. Maria ngu gbilin Yesu shin anar u haan ilev kwaghyan la, ngun ka ijiir i ka i haa kwaghyan u ujaki kua ilev mbigenev yô. Kpa er nan ve Maria kua Yosev ve lu heen aa ilev-e? Ngun ka ijiir i maren wanikundan ne ga, shin ka í?

Ei, ka í ga. Kpa ka ityôkyaa i i ne ve ve lu heen je ne: Orhemen u Roma, Shisar Agusetu, yange wa tindi er hanmaor nana hide nana yem hen gar u yange i mar nan la sha u i za nger iti i nan ken takerada yô. Ka shami, yange i mar Yosev ken Betelehem heen. Kpa shighe u un vea Maria ve va ar heen la, ijiir i tsan ken iyou i kera lu sha a ci ve mape môm tsô kpaa ga. Nahan gba u vea va lu heen vea ilev. Man sha iyange shon ne Maria mar Yesu! Kpa, er ú nenge nahan, kwagh er un ga.

Yosev man Maria kua wanikyundan Yesu

Ú nenge e̱r mbakuranilev ve lu van sha u va nengen a Yesu kpa? Yange ve lu ken toho tugh ve lu nengen sha ilev vev, man iwanger ta sha ave ningir tser. Yange i lu ortyom! Mciem ta mbakuranilev mbara iyol kpishi. Kpa ortyom la kaa er: ‘De cie nen ga! M va ne aa loho u dedoo. Nyian, ken Betelehem, i̱ mar Kristu Ter. Una yima ior! Né za zua a na i wa un ken akondo i gbir shin anar u haan ilev kwaghyan la.’ Fese nahan mbatyomov kpishi ve va kohol man ve gba wuese Aôndo. Nahan her la je mbakuranilev mban ve kar á kar sha u za keren hen ape Yesu lu yô, man hegen ne ve va zua a na.

Ú fa er i hii ve Yesu a lu icighanor nahan kpa? Ú fa or u á lu jim kpa? Umbur, ken kwaghôron u hiihii u ken takerada ne la yange se ôr kwagh u Wan u Aôndo u hiihii. Wan ne yange er tom vea Yehova sha u gban sha man tar kua akaa a genegh cii. Ka shami, ka or u Yesu á lu je ne!

Een, Yehova yange tôô uma u Wan na sha man va wa ken Maria. Hen shighe la je man wan hii u vesen ken iyav nav di vough er ônov ka ve vese ken iyav mbu ungô vev nahan. Kpa wanikundan ne lu Wan u Aôndo. Ken masejime yô i mar Yesu heen shin anar u haan ilev kwaghyan shimi ken Betelehem. Ú nenge hegen er i hii ve yange mbatyomov mban lu a iember kpishi shi ve fatyô u ôron ior er í mar Yesu kpa?

Luka 2:1-20.



Mbampin

  • Wanikyundan u a lu ken foto heen ne ka ana, man ka hana Maria a lu gbirin un laa?
  • Hii nan ve yange i mar Yesu ken ityôruile ijiir i môm a ileve?
  • Ior mba ve lu nyôron ken ityôruile ken foto heen ne ka unô, man ortyom kaa a ve ér nyi?
  • Hii nan ve Yesu lu icighanoro?
  • Er nan ve a fatyô u yilan Yesu ér wan u Aôndo?

Mbampin mbagenev

  • Luka 2:1-20.

    Kanyi tom Shisar Agusutu yange er sha u kuren kwaghôron u profeti u i er sha kwagh u mar u Yesu laa? (Luka 2:1-4; Mika 5:2)

    Or a er nan ve a kaa ér nan ngu môm ken ‘ior mba i doo Aôndo ve’ laa? (Luka 2:14; Mat. 16:24; Yoh. 17:3; Aer. 3:19; Heb. 11:6)

    Aluer mbakuran ilev mba ken Yudia mba vé gba jime la kpa ember mmar u Oryiman yô, ka ityôkyaa i vesen i nyi mbatomov mba Aôndo nyian ve lu a mi i embere? (Luka 2:10, 11; Ef. 3:8, 9; Mpa. 11:15; 14:6)