Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 100: Yesu ken Sule

Kwaghôron u sha 100: Yesu ken Sule

E̱R VE undu kpoyou u sha la kera yô, Yesu man mbaapostoli nav ve due ve yem ken sule u Gesemane. Ve vanden van heen ashighe kpishi ken jime. Yesu ôr a ve hegen er ve̱ lu per shi ve̱ eren msen. Tsô a kporom sha hemen kpeghee, man a gure a suwa ityough inya sha u eren msen.

Ken masejime yô Yesu hide va hen ape mbaapostoli nav ve lu̱ la. Ú hen wer mba eren nyi? Ve gba mnyam! Yesu ôr a ve kwa tar er ve̱ lu per, kpa hanma kwa u á hide cii yô á kohol ve yaven. ‘Er nan ne lu yaven sha imba shighe ne nahana?’ Yesu kaa nahan sha kwa u masejime u a hide la. ‘Shighe kuma hegen u a nam sha ikev i mbaihomov av yô.’

Hen shighe la je man i ungwa akenge a zege ikpelaior. Nenge! Ior mbara mba van a awange man agbur! Shi mba a ikon i yeghen usu sha u nan ve iwanger. Shighe u ve kporom ikua yô, or due ken atô u ikpelaior la nan va hen ape Yesu lu la. Nan va suse un zwa, di vough er ú nenge heen nahan. Or la ka Yuda Isekarioti! Er nan ve a suse Yesu zwa?

Yuda tee Yesu

Yesu pine er: ‘Yuda, ú teem sha u susen mo zwaa?’ Een, zwa susen la ka ikav. Ú wase ior mba ve lu vea Yuda la sha u fan er ka Yesu, or u ve soo la je ne. Nahan maa mbaihomov mba Yesu due sha u kôron un. Kpa Peteru una gba den er i̱ kôr Yesu a iniôngon shio nahan ga. A tsua sanker u yange va a mi la man a gber or u yange hemba lun ikua a na la. Sanker la yende ityough ki or la kpeghee kpa kar asegh un tou ku yanegh. Kpa Yesu penda uwegh nagh sha ku hide sôr ku heregh.

Yesu kaa a Peteru er: ‘Hide a sanker wou wa ken var. U hen wer me fatyô u pinen Terem sha u a̱ nam mbatyomov udubu udubu sha u ve̱ va yimam gaa?’ Een, una fatyô! Kpa Yesu pine Aôndo er a̱ tindi mbatyomov ga, sha ci u a fa er shighe kuma u mbaihomov nav vea kôr un yô. Nahan a de̱ er ve̱ kôr un ve̱ yem a mi. De se nenge kwagh u á er Yesu hegen yô.

Mateu 26:36-56; Luka 22:39-53; Yohane 18:1-12.



Mbampin

  • Er Yesu vea mbaapostoli nav undu kpoyou u sha la yô, ve yem hana, man á kaa a ve ér ve er nyi?
  • Yesu hidi ve hen ape mbaapostoli nav lu la yô, á nenge ve lu eren nyi, man kwagh ne kimbir kuma kwa me?
  • Er ú nenge ken foto ne nahan, ka unô ve nyer ken sule laa, man Yuda u Isekarioti er nyi?
  • Er nan ve Yuda suse Yesu zwa, man Peteru er nyi kwagha?
  • Yesu yange kaa a Peteru ér nyi, kpa hii nan ve Yesu yange pine Aôndo ér a̱ tindi mbatyomov ga?

Mbampin mbagenev

  • Ôr Mateu 26:36-56.

    Gbenda u Yesu yange kôôm mbahenen nav la ka ikyav i dedoo hen mbatamen mba ken Kristu nyian nena? (Mat. 20:25-28; 26:40, 41; Gal. 5:17; Ef. 4:29, 31, 32)

    Yesu yange nenge ieren i or tôôn ikyav mbi tswamev nôngon num a orwanndor la nena? (Mat. 26:52; Luka 6:27, 28; Yoh. 18:36)

  • Ôr Luka 22:39-53.

    Yange ortyom ande hen Yesu ken sule u Gesemane sha u taver un ishima, nahan ngula tese ér jighjigh u nan u Yesu kera taver ga shinii? Na mpase. (Luka 22:41-43; Yes. 49:8; Mat. 4:10, 11; Heb. 5:7)

  • Ôr Yohane 18:1-12.

    Yesu yange kura mbahenen nav sha ikyev i mbaahendanev nav nena, man kwagh ne tese se nyi? (Yoh. 10:11, 12; 18:1, 6-9; Heb. 13:6; Yak. 2:25)