Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Takerada Wam Ú Akaaôron A Bibilo

Kwaghôron u sha 74: Or u Á Cian Kwagh Ga La

Kwaghôron u sha 74: Or u Á Cian Kwagh Ga La

NENGE ior mba nahan gumor ne tar. Ú fa or u á lu kpa? Ka Yeremia je ne. Un ka profeti u vesen u Aôndo.

Ior mba nahan Yeremia tar

Er Tor Yoshia yange hii u hemben ieev ken tar la kera ica lu a̱ gba ga tsô, Yehova kaa a Yeremia er a̱ lu profeti Na. Nahan cii kpaa, Yeremia hen er un ngu iyev gande u una lu profeti yô. Kpa Yehova kaa er Una wase un.

Yeremia kaa a Mbaiserael er ve̱ de u eren akaabo. ‘Mbaaôndo mba akuraior á civir la ka mba aiev,’ a kaa nahan. Kpa Mbaiserael kpishi hemba soon u civir ieev a u civir Aôndo u mimi Yehova. Shighe u Yeremia ôr ior er Aôndo una tsaha ve sha ci u aeren a ve a bo la yô, ve se un a se.

Anyom kar. Yoshia kpe, man iwer ngi karen itiar yô wan na Yehoyakim hingir tor. Yeremia za hemen u ôron a ior er: ‘Á tim Yerusalem aluer ne gema anza a en a bo ne ga yô.’ Upristi ve kôr Yeremia man ve ngor akenge ve kaa er: ‘Ú kuma u wuan we sha ci u akaaôron a ou ne.’ Tsô ve kaa á atiator a Iserael er: ‘I wua Yeremia, sha ci u á lam daeng sha gar wase.’

Yeremia una e̱r nena hegene? Mciem ta un iyol ga! A kaa a ve cii er: ‘Ka Yehova yange tindim er m va ôr ne akaa ne cii ye. Aluer ne gema aeren a en a bo ne ga yô, Yehova una tim Yerusalem. Kpa fa nen kwagh ne dedoo ner: Aluer ne wuam yô, ne lu wuan or u nan er ma kwaghbo ga yô.’

Atiator la de Yeremia er a̱ lu uma, kpa Mbaiserael ve de akaabo a ve ga. Ken hemen yô, Nebukadinesar, tor u Babilon, va nôngo ityav a Yerusalem. Ken masejime yô Nebukadinesar kôr Mbaiserael cii ve hingir ikpan na. Á kura ve udubu udubu á yem a ve ken Babilon. Hen ase er a lugh yô aluer ior mba ú fe ve ga ve kôr u hen ya wou ve yem a we ken tar u ú lu a̱ vande fan ga yô!

Yeremia 1:1-8; 10:1-5; 26:1-16; 2 Utor 24:1-17.



Mbampin

  • Wanyekwaor u a lu ken foto heen ne ka ana?
  • Yeremia yange hen ér nyi sha kwagh u un lun profeti, kpa Yehova kaa a na ér nyi?
  • Yeremia yange á shi ôron Mbaiserael nyi loho?
  • Upristi yange ve nôngo ér vea yange Yeremia kwaghpasen nena, kpa Yeremia tese ér un ngu a mciem iyol ga nena?
  • Er Mbaiserael gema asema ga yô, nyi kwagh i ere?

Mbampin mbagenev

  • Ôr Yeremia 1:1-8.

    Ikyav i Yeremia la tese ér, kanyi ka i na or nan kuma u lun ortom u Yehova? (2 Kor. 3:5, 6)

    Ikyav i Yeremia la ia wase ikyaior í ken Kristu nyian nena? (Orpa. 12:1; 1 Tim. 4:12)

  • Ôr Yeremia 10:1-5.

    Ka injakwagh i nyi Yeremia yange ôr u tesen ér u suur sha ieev la ka gbilinkwagh? (Yer. 10:5; Yes. 46:7; Hab. 2:19)

  • Ôr Yeremia 26:1-16.

    Asande a mba ishigh ve mkurem la ka vea taan ior icin nyian yô, ve umbur er Yehova yange wa Yeremia tindi ér a “de shi ma kwaghôron môm” ga nena? (Yer. 26:2; Dut. 4:2; Aer. 20:27)

    Ka ikyav i dedoo i nyi Yeremia yange ver sha ci u Mbashiada mba Yehova nyian sha kwagh u tan akuraior icini?

  • Ôr 2 Utor 24:1-17.

    Ka injar i bo i nyi yange i̱ due ken ieren i Yuda i hemban Yehova ato laa? (2 Utor 24:2-4, 14)