Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghôron u sha 72: Aôndo Wase Tor Hesekia

Kwaghôron u sha 72: Aôndo Wase Tor Hesekia

Ú FA er i hii ve or ne á lu eren msen hen Yehova kpa? Er nan á samber uwashika mban hen ishigh ki atse a Yehova? Or ne ka Hesekia. Un ka tor u ikwe i ihiar i ken imbusutariyan i Iserael la. Man ngu ken mbamzeiyol kpishi je. Er nena?

Tor Hesekia ngu eren msen

Ka sha ci u akumauitya a Ashiria vande timin ikwe i 10 i sha imbusutarimese la. Yehova yange na ian er kwagh ne a̱ er sha ci u ior mbara ve er afer gande. Man hegen yô akumauitya a Ashiria la shi va sha u timin tartor u ikwe ihiar ne.

Tor u Ashiria sember tindin uwashika hen Tor Hesekia. Ka uwashika mba shon je Hesekia a samber sha ishigh ki Aôndo heen ne. Uwashika mban ve naha Yehova tar, man shi ve kaa a Hesekia er a̱ de iyol nagher. Ka nahan ve Hesekia a er msen hen Yehova ye er: ‘Aye Yehova, shi yima se sha ikev i tor u Ashiria. Tsô akuraior cii aa fa er i lu we tswen ú lu Aôndo ye.’ Yehova una kegh ato hen Hesekia je kpa?

Hesekia ka tor u dedoo. Un ngu er utor mbaiferev mba ken tartor u ikwe 10 u Iserael la nahan ga, shin er ter na Tor Ahashi u lu or ifer la kpaa ga. Hesekia wa iko sha u eren sha atindi a Yehova cica cii. Nahan yô, er Hesekia eren msen been kera yô, profeti Yesaia tindi un loho u hen Yehova er: ‘Tor u Ashiria una nyôr ken Yerusalem mayange ga. Mô ken mbautyaav nav tsô kpaa nana va ikua a na ga. Vea ker ivaan i môm tsô kpaa sha gar la ga.’

Kenger foto u a lu sha peeji ngun ne. Ú fa ior mbautyaav mba ve hee inya kpenegh ne kpa? Ka Mbaashiria. Yehova yange tindi ortyom na, man ken tugh môm tseegh orityom la wua mbautyaav mba Mbaashiria iyenge 185,000. Nahan tor u Ashiria hide yem ken ya.

Mbautyaav mba Mbaashiria mba i wua ve yô

Tartor u ikwe ihiar la maa war, man ior zua a bem anshighe kpeghee. Kpa er Hesekia kpe kera yô wan na Manase hingir tor. Manase kua wan na Amon mba yange ve kar ve hemen sha ityough nagh la cii ve lu utor mbaiferev kpishi je. Nahan shi tar la cii iv a ifer man ipila. Shighe u mbatomov mba Tor Amon ve wua un kera yô, i na wan na Yoshia tor u tartor u ikwe ihiar la.

2 Utor 18:1-36; 19:1-37; 21:1-25.



Mbampin

  • Or u a lu ken foto heen ne ka ana, man hii nan ve á lu ken mbamzeyol kpishi?
  • Ka uwashika mba nyi Hesekia a samber sha ishigh ki Aôndo, man Hesekia er msen sha nyi kwagha?
  • Hesekia lu nyi toro, man Yehova tindi un a nyi loho sha ikyev i profeti Yesaia?
  • Kanyi ortyom u Yehova a er a Mbaashiria er i tese ken foto heenee?
  • Shin er tartor u ikwe ihiar la lu ken bem hen anshighe kpeghee nahan kpa, Hesekia kpen yô, nyi kwagh i ere?

Mbampin mbagenev

  • Ôr 2 Utor 18:1-36.

    Orshua u Mbaashiria Rabeshake yange nôngo ér una na iyol i kpe Mbaiserael, ve de kera ne Yehova jighjigh ga nena? (2 Utor 18:19, 21; Eks. 5:2; Ps. 64:3)

    Mbashiada mba Yehova ka vea tagher a mbaahendanev yô, ve dondo ikyav i Hesekia la nena? (2 Utor 18:36; Ps. 39:1; Anz. 26:4; 2 Tim. 2:24)

  • Ôr 2 Utor 19:1-37.

    Mbatomov mba Yehova nyian ka ve dondo ikyav i Hesekia la sha shighe u ican i tser ve la nena? (2 Utor 19:1, 2; Anz. 3:5, 6; Heb. 10:24, 25; Yak. 5:14, 15)

    Mhembe u í hemba Tor Senakeribi la lu ker akpamber atar nena, man u ôron kwagh sha inja i profeti yô, á tile sha ityough ki ana? (2 Utor 19:32, 35, 37; Mpa. 20:2, 3)

  • Ôr 2 Utor 21:1-6, 16.

    Hii nan ve í kaa ér Manase lu môm ken utor mba hemban vihin tu mba ve tema tor ken Yerusalem ciili?